Astana qalasynyń naqtylanǵan bıýdjeti qandaı
ASTANA. KAZINFORM – Astananyń 2026 jylǵa naqtylanǵan bıýdjetiniń jalpy kólemi 1 490 674 mln teńgeni qurady. Bul týraly Astana qalasynyń Ekonomıka jáne bıýdjettik josparlaý basqarmasy basshysy Aıjan Túgelbaeva depýtattarǵa arnalǵan baıandamasynda málimdedi.
Onyń aıtýynsha, bıýdjettiń túsimder bóliginde menshikti kirister 1 316 947 mln teńgeni, al respýblıkalyq bıýdjetten bólingen qarajat 102 921 mln teńgeni qurady.
– Mektepterdegi oqýshylar kontıngentiniń 33 myńnan astam balaǵa artýyna baılanysty áleýmettik saladaǵy shyǵystardyń edáýir bóligi – 14,7 mlrd teńge bilim berý júıesine baǵyttalady. Bul qarajat pedagogterdiń eńbekaqysyn tóleýge, orta bilimdi jan basyna shaqqandaǵy qarjylandyrýǵa, oqýlyqtar satyp alýǵa, jańa synyptardy materıaldyq-tehnıkalyq jaraqtandyrýǵa, sondaı-aq oqýshylardy qosymsha bilimmen qamtýǵa jumsalady, – dedi ol.
Spıkerdiń aıtýynsha, jumyspen qamtý jáne áleýmettik qorǵaý salasynda da áleýmettik qyzmet alýshylar kontıngentiniń óskeni baıqalady. Osyǵan baılanysty múgedektigi bar 5 myńnan astam adamdy jáne áleýmettik osal toptardaǵy 29 myń azamatty qoldaýǵa 5,8 mlrd teńge bólý kózdelip otyr.
– Avtobýs parkin qosymsha sýbsıdııalaýǵa 15 mlrd teńge, al jylytý maýsymyna daıyndyq aıasynda otyn satyp alýǵa 8 mlrd teńge qarajat qarastyrylǵan. Aýmaqtardy abattandyrý men damytýǵa 19,5 mlrd teńge bólinedi, – dep tolyqtyrdy Aıjan Túgelbaeva.
Sonymen qatar Astana qalasynyń bıýdjetine 558 mlrd teńge salyq túskenin jazǵanbyz.
