Astana qalasynyń bıýdjetine 558 mlrd teńge salyq tústi
ASTANA. KAZINFORM – Astana qalasynyń ekonomıka jáne bıýdjettik josparlaý basqarmasynyń basshysy Aıjan Túgelbaeva qala ákimdiginiń ekonomıkalyq kórsetkishteri týraly Astana qalasy máslıhatynyń kezekti sessııasynda depýtattarǵa esep berdi.
– Astananyń damýyna salynǵan jeke jáne memlekettik ınvestıtsııalardyń qomaqty kólemi ekonomıkanyń turaqty ósýine serpin berdi. Jyl basynan beri jalpy ónim kólemi ótken jylǵy osy kezeńmen salystyrǵanda 8,9%-ǵa ósip, 4,2 trıllıon teńgeni qurady, – dedi ol.
Onyń aıtýynsha, ekonomıkanyń belsendi damýy memlekettik bıýdjetke salyqtyq túsimderdiń 28,8%-ǵa nemese 558 mlrd teńgege artýyn qamtamasyz etken. Alaıda korporatıvtik tabys salyq tóleýshileriniń bir bóliginiń qaıta bólinýine baılanysty negizgi ósim respýblıkalyq bıýdjet boıynsha tirkelgen – 47% nemese 535 mlrd teńge.
– Jergilikti bıýdjet boıynsha salyq jınaý deńgeıi ótken jyldyń naqty bazasynan 110,1%-dy quraıdy. Sol sebepti aǵymdaǵy naqtylaý sheńberinde tek jospardan tys salyqtyq emes túsimder – 12,4 mlrd teńgeni paıdalaný josparlandy, – dedi ol.
Aıjan Túgelbaevanyń málimetinshe, qosymsha shyǵystarǵa bólingen qarjylandyrýdyń jalpy kólemi 71,8 mlrd teńgeni qurady. Onyń ishinde 54 mlrd teńgeden astamy áleýmettik mindettemeler men sýbsıdııalaýǵa baǵyttalady dep josparlanyp otyr.
Aıta keteıik, SQO-da kásipkerlerdiń salyq bereshegi 6 mlrd teńgege jýyqtady.
