Astana qalasynyń áýe keńistigi ýaqytsha jabylady

ASTANA. KAZINFORM – 22 sáýir men 7 mamyr aralyǵynda saǵat 10:00-den 13:00-ge deıin Astana qalasynyń áýe keńistiginde ýaqytsha qozǵalys shekteledi. Bul týraly QR Kólik mınıstrligi málim etti.

— Qazaqstan Respýblıkasy Qorǵanys mınıstrliginiń aqparatyna sáıkes elordada 2025 jylǵy 22 sáýir men 7 mamyr aralyǵynda saǵat 10:00–den 13:00–ge deıin áskerı paradty daıyndaýǵa jáne ótkizýge baılanysty áskerı avıatsııanyń oqý-jattyǵý ushýlaryn oryndaý úshin Astana qalasynyń áýe keńistigin paıdalanýǵa qysqa merzimdi shekteýler engiziledi, — dep habarlady vedomstvodan.

Osyǵan baılanysty quzyrly organ jolaýshylar saparyn josparlaý kezinde atalǵan shekteýlerdi eskerip, áýe kompanııa men áýejaıdaǵy aqparat qyzmetterinen reıs kúıin tekserýdi  ótindi. 

Eske sala keteıik, buǵan deıin Samarqandqa jańa áýe baǵyty ashylǵanyn jazǵan bolatynbyz.