Astana qalasynyń ákimi turǵyndardy Naýryz merekesimen quttyqtady
ASTANA. KAZINFORM – Elordanyń ákimi Jeńis Qasymbek qala turǵyndary men qonaqtaryn quttyqtady, dep habarlaıdy elorda ákimdiginiń resmı saıty.
– Qurmetti elorda turǵyndary men qonaqtary! Barshańyzdy kóktemniń shýaqty merekesi – jańarý men jańǵyrýdyń, birlik pen berekeniń nyshany bolǵan Naýryz meıramymen shyn júrekten quttyqtaımyn! San ǵasyrlyq tarıhy bar bul mereke urpaqtar sabaqtastyǵyn jalǵap, ár shańyraqqa jylýlyq pen izgilik nuryn syılaıdy.
Astana – mádenıet pen tarıh toǵysqan, zamanaýı jetistikter órken jaıǵan qala. Biz birlese otyryp, elordamyzdy odan ári damytyp, ony jaıly da serpindi, jańa múmkindikterge jol ashatyn shaharǵa aınaldyryp kelemiz.
Elordada 14 naýryzdan bastap Naýryz merekesin toılaýǵa arnalǵan Naýryznama onkúndigi bastaý aldy. Qalada 10 kún boıy 200-den astam túrli is-shara ótip jatyr: kontsertter, kórmeler, ulttyq sport túrlerinen jarystar, shyǵarmashylyq keshter, sport oıyndary, qaıyrymdylyq sharalary jáne t.b. Merekelik baǵdarlamalar qalanyń barlyq alty aýdanynda uıymdastyrylǵan.
Naýryz merekesi ár shańyraqqa jylýlyq, shattyq pen tatýlyq ákelsin. Sizderge myqty densaýlyq, baqyt jáne jańa jetistikter tileımin, - dep jazdy Jeńis Qasymbek.
Eske sala keteıik, budan buryn elorda men Almatyda mereke kezinde balalarǵa arnalǵan qandaı qyzyqtar bar ekenin jazǵanbyz.