Astanadaǵy 13 qabatty turǵyn úıden órt shyqty
ASTANA.KAZINFORM — Osy sátte TJM qyzmetkerleri Astana qalasynyń Baıqońyr aýdanyndaǵy Otyrar kóshesinde ornalasqan 13 qabatty turǵyn úıden shyqqan órtti aýyzdyqtap jatyr. Bul týraly TJM baspasóz qyzmeti málim etti.
112 nómirine zardap shekkender týraly aqparat túsken joq.
Alǵashqy órt sóndirý bólimsheleri oqıǵa ornyna kelgen kezde joǵarǵy qabattardaǵy balkondardyń ashyq jalynmen janýy baıqaldy. Qabyldanǵan jedel sharalardyń nátıjesinde ashyq jalyn sóndirildi. TJM qyzmetkerleri qutqarý maskalaryn qoldana otyryp, 4 adamdy, onyń ishinde 1 balany qutqardy. Sonymen qatar, 10 adam TJM kúshterimen evakýatsııalandy. Zardap shekkender joq. Órt 40 sharshy metr aýmaqta tolyq sóndirildi.
Eske sala keteıik, sınoptıkterdiń boljamynsha, Qazaqstannyń birqatar óńirinde shańdy daýyl, naızaǵaı, burshaq, qatty jel jáne aptap ystyq kútiledi. Sonymen qatar órt qaýpi de joǵary bolýy yqtımal ekeni eskertildi.
Al bir aptada «Semeı ormanynda» 15 órt oshaǵy anyqtalyp, der kezinde joıyldy.
