Astanada aýtızmmen aýyratyn 2000-daı bala bar
ASTANA. KAZINFORM — Astanada erekshe balalardy ońaltý boıynsha 2016 jyldan beri jumys istep kele jatqan Orda Autism balalardy túzetý ortalyǵynyń besinshi fılıaly ashyldy. Bul týraly Astana qalasynyń ákimdigi málim etti.
Almaty aýdanyndaǵy M. Tólebaev kóshesinde ornalasqan jańa ortalyqtyń ashylýyna aýdan ákimi Rústem Táýekelov, Astana qalasy Jumyspen qamtý jáne áleýmettik qorǵaý basqarmasynyń basshysy Ilıa Skýb, aýdan aqsaqaldary, ata-analar men demeýshilik etken kásipkerler qatysty.
«Orda» aýtızmi bar balalar ata-analarynyń birlestigi» QB-ǵa qarasty ortalyqtyń maqsaty — erekshe bilim berýdi qajet etetin balalardy áleýmettendirý, damytý jáne qoldaý, sonymen qatar olardyń qoǵamǵa tolyqqandy sińisip ketýine yqpal etetin ınklıýzıvti orta qalyptastyrý.
Ortalyq ǵımaratynda logoped, defektolog, psıhologtar kabınetteri bar, beıimdeýge arnalǵan dene shynyqtyrý jattyǵýlary ótkizilip, art terapııa, mýzyka terapııa, oıyn terapııasy boıynsha toptyq sabaqtar beriledi, sonymen qatar bir ereksheligi — bul jerde balalardyń óz-ózine kútim jasaýyna arnalǵan kabınet, ıaǵnı shashtaraz salony da ashylǵan.
— Astanada 9 jyldan beri osyndaı erekshe balalarǵa arnaıy áleýmettik qyzmetter kórsetip kelemiz, sonymen qatar bizde túzetý qyzmeti de bar. Dál qazir barlyq fılıalda Astanadaǵy 18 jasqa deıingi 684 aýtızmi bar balalar men jasóspirimderdi arnaıy qyzmetpen qamtyp otyrmyz. Sonyń ishinde osy jańa ortalyqqa 90 bala tirkeldi. Olarǵa barlyǵy 140 adam qyzmet etedi. Qyzmetkerlerdiń qaq jartysy — erekshe balalardyń analary. Elordanyń, sonyń ishinde aýdan ákimdiginiń, áleýmettik kásipkerlik qaýymdastyǵynyń qoldaýymen jańa ǵımarat bizge tegin berildi, ıaǵnı jaldaý aqysyn tólemeımiz. Al jóndeý, abattandyrý jumystaryn demeýshilerdiń kómegimen júzege asyrdyq, osy túrǵyda jergilikti ákimdikke, barlyq demeýshilerge alǵysymyz sheksiz, — deıdi «Orda» aýtızmi bar balalar ata-analarynyń birlestigi» QB tóraǵasy Saltanat Esmaǵanbetova.
Onyń aıtýynsha, qazir Astana qalasynda aýtızmmen aýyratyn 2000-daı bala bar. Jyl saıyn olardyń sany 13 paıyzǵa artady. Sondyqtan bul ortalyqqa suranys joǵary. Oǵan atalǵan mekemeniń sapaly senimdi qyzmeti de sep. Tipti ózge óńirlerden arnaıy osy jerge balalaryn ákelip qaratatyndar kóbeıgen.
Ashylý saltanatynda aýdan ákimi men basqarma basshysy ortalyqtyń lentasyn qıyp, óz sózinde bul ortalyq alǵash ashylǵan kúnnen bastap erekshe balalary bar júzdegen otbasylarǵa senim men úmit syılaǵanyn jetkizdi. Aldaǵy ýaqytta da onyń jumysyn qoldaýǵa bılik ókilderi daıyn ekenin alǵa tartty.
Aýdan ákimi jáne Jumyspen qamtý jáne áleýmettik qorǵaý basqarmasynyń basshysy atynan ortalyqtyń belsendi qyzmetkerleri men demeýshilerine Alǵys hattar tabystaldy. Aqsaqaldar aq batasyn berip, ájeler shashý shashty. Balalary úshin qamkóńil ata-analar taǵy bir jańa túzetý ortalyǵynyń ashylǵanyna qýanyshyn bildirdi.
Qazaqtildi robot aýtızmdi qalaı emdep júrgenin myna siltemeden oqyńyz.