Astana qalasy Tótenshe jaǵdaılar departamentiniń bastyǵy taǵaıyndaldy
Tótenshe jaǵdaılar mınıstri Syrym Sháriphanov elordalyq TJD jańa bastyǵyn jeke quramǵa tanystyrdy. Mınıstr buıryǵymen Astana qalasy Tótenshe jaǵdaılar departamentiniń bastyǵy qyzmetine Marat Muhametqalıuly Kúldikov taǵaıyndaldy, dep habarlaıdy QazAqparat.
Departamentten málim etkendeı, Marat Kúldikov 1967 jyly Semeı oblysynda dúnıege kelgen. QR ІІM Almaty joǵary tehnıkalyq ýchılışesin jáne QR TJA Kókshetaý tehnıkalyq ınstıtýtyn bitirgen. Eńbek jolyn 1989 jyly órt sóndirýshi bolýdan bastap QR Tótenshe jaǵdaılar vıtse-mınıstrine deıingi qyzmet atqardy.
Buǵan deıing elordalyq TJD basshysy bolǵan Qýanar Bazarbaev atqarylǵan jumystar, onyń ishinde órt sóndirý bólimderin qaıta jańartý, jańa órt sóndirý depolaryn salý, qajetti tehnıkamen jáne jabdyqtarmen jaraqtandyrý týraly baıandady. Sondaı-aq, ol Astanada Órt sóndirýshiler men qutqarýshylardyń mádenıet jáne demalys parki jumys isteıtinin atap ótti.
