Astana qalalyq sotynda Qazaq handyǵynyń 550 jyldyǵyna oraı konferentsııa ótti (FOTO)
ASTANA. QazAqparat - Astana qalalyq sotynda «Qazaq handyǵyn qalyptastyrý men nyǵaıtýdaǵy Qazaq eliniń quqyǵy jáne bıler sotynyń tóreligi» atty ǵylymı-tájirıbelik konferentsııa ótti. Sharaǵa qalalyq sottyń, aýdandyq jáne oǵan teńestirilgen sottardyń keńse basshylary men mamandary qatysty, dep habarlady qalalyq sottyń baspasóz qyzmetinen.
Konferentsııany Astana qalalyq sotynyń sýdıasy Oralhan Tursynov ashyp, «Qazaq handyǵyn nyǵaıtýdaǵy bıler ınstıtýtynyń dıplomatııalyq qyzmetteri» taqyrybynda baıandama jasady.
Astana qalalyq sotynyń Keńse basshysynyń orynbasary Aıbol Ibragımov Qazaq handyǵynyń negizin qalaǵan Kereı men Jánibek handar, Qazaq handyǵyn nyǵaıtýǵa súbeli úles qosqan Qasym han, Esim han, Táýke han, Jáńgir han, Áz Táýke han, Abylaı han, Ábilqaıyr han, Kenesary han jáne áıgili Tóle bı, Qazybek bı, Áıteke bılerdiń elimizdiń quqyqtyq júıesin nyǵaıtýdaǵy róli, el basqarýǵa daıyndaǵan zań-erjeleri men bıler sotynyń tóreligi jóninde aıtty. Jıynda Qazaq handyǵynyń 550 jyldyǵyna arnalǵan hronologııalyq beıne sıýjet kórsetildi. Beınebaıanda bedeli zor aıbyndy Alash jurtynyń azattyq jolyndaǵy azap pen qaıǵyǵa toly zobalań kezeńderi tarıhı derektermen beınelenip, táýelsizdik alǵanǵa deıingi Qazaq eliniń azattyq joly sýretteldi. Birtutas memlekettik bılik isine aralasyp, kósem sóz, ótkir til, ádil danalyǵymen tanylǵan Tóle bı, Qaz daıysty Qazybek bı, Áıteke bılerdiń róli, Qazaq handyǵyn qalyptastyrý men nyǵaıtýdaǵy Qazaq eliniń quqyǵy, bıler sotynyń tóreligi, dala zańdarynyń memlekettik bılikti damytýdaǵy mańyzy, memleket basqarýdaǵy handar men sultandardyń róli taqyryptarynda L.N.Gýmılev atyndaǵy Eýrazııa ulttyq ýnıversıtetiniń professory, tarıh ǵylymdarynyń doktory Altaıy Orazbaevanyń, Qazaq gýmanıtarlyq-zań ýnıversıtetiniń professorlary Lepýda Muqataeva men Gúlmıra Sultanǵazynyń baıandamalary tyńdaldy.
