Astana qalalyq prokýratýrasynda densaýlyq saqtaý mekemeleri basshylarynyń qatysýymen alqa májilisi ótti

Qalalyq densaýlyq saqtaý mekemeleriniń basshylary qatysýymen ótken jıyn barysynda emdeý mekemelerinde balalar densaýlyǵyn saqtaýǵa baǵyttalǵan zańnamanyń qoldanylýyna, sonymen qatar medıtsınalyq kómektiń kepildi kólemine, onyń ishinde múmkindigi shekteýli jandarǵa tolyq usynylýyna qatysty tekserý qorytyndysy qaraldy.

Prokýrorlyq tekseristiń qorytyndysy boıynsha negizgi baıandama jasaǵan Astana qalasy prokýrorynyń kómekshisi Olga Ionovanyń aıtýynsha, medıtsınalyq mekemelerde jiberiletin, onyń ishinde ımmýnoprofılaktıkalyq is-sharalardy uıymdastyrýdaǵy óreskel zań buzýshylyqtar tekserý nátıjesinde naqty anyqtalǵan.

«2009 jyly ártúrli aýrýlar boıynsha múgedektikteri bar 948 bala tirkelgen. Onyń ishinde júıke júıesi aýrýǵa shaldyqqandar aldyńǵy orynda tur. Osy aýrýmen 261 bala tirkelse, onyń úshten biri 3 jasqa deıingi sábıler», dedi ol.

Onyń keltirgen derekteri boıynsha, ekinshi orynda týa bitken anomalııaǵa shaldyqqandar tur. Ótken jyly týa bitken damý aqaýymen 207, qulaq jáne sostsevıd óskini aýrýlarymen 102, psıhıkasy men minez-qulqy buzylǵan 189 bala dúnıege kelse, onyń 187-siniń aqyl-esi kem.

«Sonymen qatar damýynda aýytqýlary bar balalar sany jyl saıyn anyqtalýda, jaǵdaı múldem ózgermeı otyr. Zeınetaqy jáne járdemaqy tóleý ortalyǵynyń málimetteri boıynsha, 2009 jyly qańtarda 1136 tulǵa múgedektigi boıynsha járdemaqy alsa, tekserý kezinde olardyń sany 1426-ǵa jetken», deıdi O. Ionova.