Astana qalalyq prokýratýrasy «Alıansqurylysınvest» kompanııasynyń basshysyna qatysty qozǵalǵan qylmystyq isti tolyq toqtatýy múmkin
ASTANA. Aqpannyń 3-i. QazAparat /Jasulan Amanbaıuly/ - Astana qalalyq prokýratýrasy «Alıansqurylysınvest» kompanııasynyń basshysy Rınat Naımanovqa qatysty qozǵalǵan qylmystyq isti tolyq jabýy múmkin.
Bul týraly búgin Astana qalasy prokýratýrasynyń 2009 jylǵy jumysyn qorytyndylaýǵa arnalǵan jıyn barysynda qalanyń bas prokýrory Vıktor Korchagın málim etti, dep habarlaıdy QazAqparat.
Ol úshin qurylys nysandarynyń jumysyn ýaqytynda aıaqtap, úleskerlerdiń páterlerin tezirek paıdalanýǵa berilýi qamtamasyz etilse bolǵany.
«Barlyq qurylys nysandary salynyp bitse, barlyq adamdar rıza bolsa, onda tergeý organdary qazirgi zańnama talaptaryna saı, tergeý barysynda jaǵdaıdyń ózgerýine baılanysty protsessýaldyq sheshim arqyly isti tolyq toqtatýy múmkin. Al eger onyń aldyna qoıylǵan mindetter men talaptar oryndalmaıtyn bolsa, ol qamaýǵa alynyp, is sotqa jiberiledi», dedi V. Korchagın.
Qazirgi kezde ol ózine alynǵan mindetterdi oryndaýdy sátti atqarýda. Astanada ákimdikte ótken keńeste «Alıansqurylysınvest» JShS-ne tıesili qurylys nysandaryn «ATF» banki arqyly «Samuryq-Qazyna» qorymen qarjylandyrý bekitilgendigi málimdelgen bolatyn. Bıyl kompanııanyń birqatar turǵyn úıleri paıdalanýǵa berilmek. Onyń 1 myńnan asatyn úleskerleri jaqyn arada baspanaly bolady. Keńes otyrysy barysynda kompanııa basshysy R.Naımanov «Alıansqurylysınvest» JShS-niń 2400 úleskeri bıyl baspanalaryna ıe bolatynyn» atap kórsetti.
Esterińizge sala keteıik, qazannyń 18-i kúni R.Naımanovqa «Lesnaıa polıana» turǵyn úı kesheni úleskerleriniń 3,462 mıllıard teńge kólemindegi qarjysyn jymqyrdy degen aıyp taǵylyp, ony tutqyndaý jóninde sottyń sheshimi shyqqan. Al qarasha aıynyń 9-y kúni Astana qalasynyń qurylys salýshylary qaýymdastyǵynyń ókilderi R.Naımanovtyń jazasyn ózgertip, ony úıqamaqqa alý jóninde ótinish túsken. Osylaısha prokýratýra da, úleskerler de, qala basshylyǵy da qurylys nysandarynyń paıdalanýǵa berilýin tezdetýge uıǵarǵan.
