Astana qalalyq MKD jáne QTJ laýazymdy qyzmetkerleriniń ústinen is qozǵaldy
ASTANA. QazAqparat - Para aldy degen kúdik boıynsha Astana qalasy Memlekettik kirister departamenti basshysy orynbasarynyń, «Áýejaı Astana» keden beketiniń basshysy jáne osy bekettiń bas mamanynyń, «Qazaqstan Temir joly» UK» Aq Jol jáne ǵımarattar departamenti dırektorynyń ústinen qylmystyq is qozǵaldy, dep habarlaıdy QazAqparat tilshisi.
«Sybaılas jemqorlyqqa qarsy is-qımyl ulttyq bıýrosynyń elordalyq departamenti Bas kólik prokýratýrasymen birlesip Astana qalasy Memlekettik kirister departamenti basshysynyń orynbasaryn, «Áýejaı Astana» keden beketiniń basshysyn jáne osy bekettiń bas mamanyn ustady. Olar zergerlik buıymdardy kontrabandalyq jolmen tasymaldaý boıynsha kedendik baqylaýdy júzege asyrmaý úshin jeke tulǵalardan para aldy degen kúdikke ilinip otyr», - dedi búgingi brıfıngte Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Janna Bastarova. Sot sanktsııasymen kúdiktiler qamaýǵa alynǵan.
Sonymen birge, Janna Bastarova «Qazaqstan Temir joly» Ulttyq kompanııasy» aktsıonerlik qoǵamynyń Jol jáne ǵımarattar departamenti dırektorynyń zańsyz áreketiniń joly kesilgenin aıtty.
«Qazaqstan Temir Joly» Ulttyq kompanııasy» Aktsıonerlik qoǵamynyń Jol jáne ǵımarattar dapartamenti dırektoryna qatysty sotqa deıingi tergeý júrgizilýde. Ol Tobyl jol dıstantsııasynyń bastyǵynan para aldy degen kúdikpen ustaldy. Tergeý jalǵasýda», - deıdi Janna Bastarova.
