Astana qalalyq Mamandandyrylǵan aýdanaralyq ekonomıkalyq soty jyl basynan beri 5,5 myńnan astam iske sheshim shyǵardy
ASTANA. QazAqparat - Astana qalasy Mamandandyrylǵan aýdanaralyq ekonomıkalyq sotyna 2015 jyldyń birinshi jarty jyldyǵynda 6 120 shaǵym aryz kelip tússe, sonyń 5 694-i qaralyp sheshim shyqty. Bunyń 501-i boıynsha sheshim syrttaı shyǵaryldy. Bul týraly búgin Mamandandyrylǵan aýdanaralyq ekonomıkalyq sottyń tóraǵasy Aqan Jumaǵulov málim etti.
«Jalpy osy ýaqyt aralyǵynda 6 916 is boıynsha óndiris aıaqtaldy. Osylaısha, ortasha alǵanda jyl basynan beri aýdanaralyq ekonomıkalyq sottaǵy árbir sýdıa 271 sot aktisin shyǵaryp otyr», - dedi búgin brıfıngte sot tóraǵasy.
Onyń aıtýynsha, búgingi tańda sot tarapynan ádilsotqa qoljetimdilik qaǵıdattarynyń saqtalýyna qatysty josparly jumystar atqarylýda. Bundaı jumystyń nátıjesinde aryz shaǵymdardy qaıtarý men olardyń qozǵalyssyz jatyp qalý kórsetkishi tómendep, shaǵymdardy qabyldaýdan negizsiz bas tartýdy joıý sharalary qabyldanýda.
«Ótken alty aıda sot 621 aryz shaǵymdy qaıtarsa, 113 shaǵym boıynsha qabyldaýdan bas tartyldy. Bul sotqa jalpy kelip túsken aryzdardyń 1,8 paıyzyn quraıdy. Bizdiń mindetimiz jeke jáne zańdy tulǵalar tarapynan ádilsot júıesine qoljetimdiliktiń bolýyn qamtamasyz etý», - deıdi A. Jumaǵulov.
Sot tóraǵasynyń aıtýyna qaraǵanda, sońǵy ýaqytta sottaǵy is júrgizýge aqparattyq tehnologııalardyń engizilýine baılanysty «Sot kabıneti» aqparattyq qyzmeti boıynsha aryz shaǵymdardy elektrondyq túrde qabyldaý jumystary jolǵa qoıylǵan. Máselen, aǵymdaǵy jyly Astana qalasynyń Mamandandyrylǵan aýdanaralyq ekonomıkalyq sotyna 485 elektrondyq úlgidegi shaǵymdar túsken.
