Astana qalalyq QHA Prezıdenttiń ókilettigin uzartý jóninde referendým ótkizý týraly bastamany qoldaý maqsatynda jıyn ótkizdi
Jıyn barysynda referendým ótkizý týraly ıdeıany qoldap, Astana qalasynyń úkimettik emes uıymdary men etnomádenı birlestikteriniń ókilderi sóz sóıledi. «Qazaqstan táýelsizdiginiń 19 jyly bizdiń Memleket basshymyzdyń ustanǵan jolynyń durystyǵyn kórsetti. Biz memleketimizdiń ishki saıasatynda ultaralyq birlik pen turaqtylyqtyń jarqyn úlgisi saltanat quryp otyrǵanynyń kýágeri bolyp otyrmyz. Qazaqstanda ómir súrip otyrǵan barlyq halyqtar teń quqyly. Ondaı quqyqqa biz Qazaqstannyń táýelsizdigi arqyly ǵana qol jetkize aldyq», - dedi «Vaınah» sheshen-ıngýsh etnomádenı birlestiginiń tóraǵasy, Astana qalalyq Qazaqstan halqy Assambleıasy tóraǵasynyń orynbasary Salman Geroev.
Onyń aıtýynsha, táýelsizdikten bergi jylda Elbasy N. Nazarbaevty Qazaqstan halqy Ult kóshbasshysy retinde tanyp, memlekettiń ekonomıkalyq damýyna, gýmanıtarlyq áleýetiniń artýyna eń birinshi septigin tıgizgen tulǵa retinde biledi.
Jıynǵa sáıkes, Assambleıa músheleri men ÚEU ókilderi qazaqstandyqtarǵa arnap úndeý qabyldaıtyn bolady.
Eske sala ketsek, aǵymdaǵy jyldyń 23 jeltoqsanynda Óskemende Qazaqstannyń Tuńǵysh Prezıdenti - Ult kóshbasshysy N.Á.Nazarbaevtyń ókilettiligin 2020 jyldyń 6 jeltoqsanyna deıin uzartý jóninde respýblıkalyq referendým ótkizý týraly bastama kótergen respýblıkalyq jıyn bolyp ótti. Qazaqstannyń 14 oblysy men Astana jáne Almaty qalalarynyń ókilderinen quralǵan respýblıkalyq jıynnyń 850-den astam delegaty biraýyzdan ony ótkizýdi maquldaǵan bolatyn. Al búgin QR Ortalyq saılaý komıssııasynyń otyrysynda Qazaqstan Respýblıkasynyń Prezıdenti - Ult kóshbasshysy N.Á.Nazarbaevtyń prezıdenttik ókilettiligin 2020 jylǵy 6 jeltoqsanǵa deıin uzartý jónindegi referendýmnyń bastamashyl tobyn, sondaı-aq onyń respýblıkalyq referendýmǵa usynyp otyrǵan máselesin tirkeý týraly qaýly qabyldandy.
