Astana qalalyq Іshki saıasat basqarmasy dinı joralǵylardy ótkizý erejelerin eske salady
ASTANA. 11 qazan. QazAqparat - 2011 jyldyń 25 qazanyndaǵy «Dinı qyzmet jáne dinı birlestikter týraly» Qazaqstan Respýblıkasy zańynyń 7-babynyń 2-tarmaǵyna sáıkes,
qudaıǵa qulshylyq etý, dinı joralǵylar, rásimder jáne (nemese) jınalystar ǵıbadat úılerinde (ǵımarattarynda) jáne olarǵa bólingen aýmaqta, qulshylyq etý oryndarynda, dinı birlestikter mekemeleri men úı-jaılarynda, zırattar men krematorıılerde, jaqyn jerde turatyn adamdardyń quqyqtary men múddeleri saqtalǵan jaǵdaıda turǵyn jaılarda, qajet bolǵan kezde qoǵamdyq tamaqtandyrý obektilerinde bógetsiz júrgiziledi (jasalady). Ózge jaǵdaılarda dinı is-sharalar Qazaqstan Respýblıkasynyń zańnamasynda belgilengen tártippen júzege asyrylady.
Sondaı-aq, Zańnyń 5-babynyń 4-tarmaǵyna sáıkes jergilikti atqarýshy organdar «dinı joralǵylardy ótkizýge arnalǵan ǵımarattardyń ǵıbadat úılerinen (ǵımarattarynan) tys jerde ornalasýyn kelisedi»
Osyǵan oraı Astana qalalyq Іshki saıasat basqarmasynyń eskertýinshe, atalmysh Zańnyń talaptaryna sáıkes kelmeıtin ǵıbadat bólmeleriniń qyzmeti toqtatylýy tıis, nemese Astana qalasynyń aýmaǵynda resmı tirkelgen dinı birlestikterdiń kelisimimen atalǵan ǵımarattardy jergilikti atqarýshy organdarmen kelisýi tıis.
Zańnamany buzýshylyq ákimshilik jaýapkershilikke ákelip soǵady.
