Astana qalalyq ІІD Jol polıtsııasy basqarmasynda kóshpeli qoǵamdyq keńes otyrysy ótti
ASTANA. Shildeniń 29-y. QazAqparat - Búgin Astana qalalyq ishki ister departamentiniń Jol polıtsııasy basqarmasynda departament bastyǵynyń orynbasary, polıtsııa polkovnıgi Qaırat Muhıtovtyń tóraǵalyǵymen polıtsııa qyzmetkerleriniń jumysyn baqylaý boıynsha kóshpeli qoǵamdyq keńes otyrysy ótti.
Bul aqparatty Astanalyq ІІD til saıasaty jáne aqparat bólimi taratyp otyr.
Keńeske Qoǵamdyq keńes múshelerimen qatar Jol polıtsııasynyń jeke quramy qatysty. Jıynda Jol polıtsııasy basqarmasy bastyǵynyń mindetin atqarýshy Baqytjan Malybaev «Astana qalalyq ІІD JPB-daǵy zańdylyq pen tártip jaǵdaıy, sondaı-aq sybaılas jemqorlyqqa qarsy áreket jasaý boıynsha qabyldanǵan sharalar týraly» baıandama jasap, keńes músheleriniń osy baǵyttaǵy saýaldaryna jaýap berdi. Al keńes músheleri quqyq qorǵaý organdary qyzmetkerleriniń arasynda sybaılas jemqorlyqtyń oryn alý sebepteri boıynsha óz pikirlerin ortaǵa saldy. Sondaı-aq azamattardyń avtokólikti mas kúıinde ári joǵary jyldamdyqpen júrgizýi sııaqty ákimshilik quqyq buzýshylyqtarǵa qatysty saýaldar qoıyldy.
Shara sońynda qoǵamdyq keńes músheleri sybaılas jemqorlyqpen kúres boıynsha jumystardy jetildirý maqsatynda birqatar sheshimder qabyldady.
