Astana qalalyq ІІD qyzmetkerleri týystary 15 jyl boıy izdegen azamatty tapty
ASTANA. 15 sáýir. QazAqparat - Astana qalalyq ishki ister departamenti qyzmetkerleriniń kásibı is-qımylynyń arqasynda týǵan-týystary 15 jyl boıy izdep kelgen azamat tabyldy,
dep habarlady atalǵan organnyń baspasóz qyzmetinen.
Sońy qýanyshty aıaqtalǵan bul oqıǵa bylaı bastalǵan edi. Birde polıtsııa qyzmetkerleriniń nazaryna jeke basyn kýálandyratyn tólqujaty jáne turaqty turǵylyqty jeri joq azamat ilikti. Ol quqyq qorǵaý organdaryna óziniń 1978 jyly Pavlodar oblysynda dúnıege kelgenin aıtyp, aty-jónin Dýdko Sergeı Grıgorevıch dep tanystyrady. Degenmen onyń qujaty bolmaǵandyqtan qalalyq ishki ister departamentiniń qabyldaý-taratý ornyna ornalastyrylady.
Ustalǵan azamattyń kim ekendiginiń anyqtaý jáne týystaryn izdeý barysynda Pavlodar oblysynyń turǵyny Dýdko Svetlana Pavlovna tabylady. Ol telefonmen tildesý barysynda Dýdko Sergeı Grıgorevıchti tanymaıtyndyǵyn, biraq 1998 jyly uly Polıakov Grıgorıı Grıgorevıch iz-tússiz joǵalyp ketkendigin aıtady.
Budan ári Dýdko Sergeı Grıgorevıch joǵalyp ketken G.G.Polıakov ekendigi anyqtaldy. Polıakovtyń óziniń aıtýynsha, ol 1998 jyly bas súıek-mı zaqymyn alyp, esin jartylaı joǵaltyp alǵan. Sol kezeńde bir qyzben tanysyp, onymen Aqmola oblysyna kelgen. Keıinnen ol qyzben dám-tuzy jaraspaı ajyrasqan.
Anasynyń aıtýynsha, ol ulynyń tabylatyndyǵyna senimdi bolyp, osy ýaqytqa deıin izdep kelgen.
