Astana qalalyq ІІD-inde ashyq esik kúni ótti
STANA. Mamyrdyń 21-i. QazAqparat - Búgin Astana qalalyq ishki ister departamentinde ashyq esik kúni jarııalanyp, azamattardy «Almaty», «Saryarqa», «Esil» aýdandarynyń, sondaı-aq Jol polıtsııasy basqarmasynyń basshylary ózderiniń jeke qabyldaýyna shaqyrdy.
«Seniń «Sybaılas jemqorlyqqa jol joq» degenińniń mańyzy bar» atty aqparattyq-nasıhattaý aktsııasy «Nur Otan» HDP-nyń Astana qalalyq fılıaly men Astana qalalyq ІІD bastamasymen uıymdastyrylyp otyr. Bul jolǵy shara barysynda túrli suraqtarmen kelgen turǵyndar vedomstvo bastyǵy orynbasarlarynyń qabyldaýynda bolyp, ózderin mazalaǵan suraqtaryna naqty jaýaptar aldy.
Bul aktsııa - sybaılas jemqorlyqqa qarsy buǵan deıin júrgizilip kelgen sharalardyń zańdy jalǵasy ekendigin atap ótken Astana qalalyq ІІD baspasóz qyzmetiniń jetekshisi Nurdildá Oraz «árıne, sybaılastyqtyń túp tamyryna balta shabý múmkin emes, alaıda júrgizilip jatqan sharalardyń arqasynda onyń deńgeıi aıtarlyqtaı tómendeıdi. Búgingi belgilengen sharalardyń iske asýyna búkil halyq bolyp atsalysatyn bolsaq, mine, sonda biz bul dertten aıyǵýǵa az da bolsa óz úlesimizdi qosamyz», degen pikirin bildiredi.
«Azamattar ashyq esik kúnine kelip, polıtsııa qyzmetkerleri tarapynan oryn alǵan zań buzýshylyqtar nemese sybaılas jemqorlyq oqıǵalary týraly kadr jumysy basqarmasynyń jumys tobyna 71-63-28, 71-63-09 telefondaryna habarlasýlaryna bolady», deıdi atalǵan vedomstvonyń jeke quram jónindegi ınspektsııasynyń bastyǵy Ótep Tynymbaev.
Atalǵan sharanyń naqty júzege asýyn departament basshylyǵy qatań qadaǵalaýǵa alyp otyr. Aktsııa mamyrdyń 28-inde taǵy bir márte ótedi.
