Astana qalalyq ІІD-de Konstıtýtsııa kúnine oraı sharalar ótti
Departament qabyrǵasynda Qazaqstan Respýblıkasynyń Konstıtýtsııasymen baılanysty ár túrli is-sharalar ótkizilip jatyr. Solardyń biri quqyqtyq bilimdi joǵarylatý, quqyq buzýshylyqtyń aldyn alý jáne azamattardyń konstıtýtsııalyq quqyqtaryn qorǵaý, Qazaqstan polıtsııasynyń oń ımıdjin nyǵaıtý maqsatynda «Úzdik jedel qyzmetker» jáne «Úzdik tergeýshi» atalymdary boıynsha baıqaý ótkizildi. Astana qalalyq Іshki ister departamenti bastyǵynyń orynbasary polıtsııa polkovnıgi Baqytjan Beıseevtiń tóraǵalyǵymen ótkizilgen baıqaýdyń alǵashqy kezeńi jedel ýákilderdiń Qazaqstan Respýblıkasynyń Konstıtýtsııasy, memlekettik tildi jetik meńgerý boıynsha test tapsyrysymen bastaldy. Baqytjan Beıseev baıqaýǵa qatysýshylarǵa tabys tilep, osy baǵyttaǵy sharalardyń aldaǵy ýaqytta jalǵasatynyn aıtty. Komıssııa músheleriniń biri, Astana qalasy boıynsha prokýratýrasynyń jedel-izdestirý jumysynyń zańdylyǵyn qadaǵalaý boıynsha basqarmasy bastyǵynyń mindetin atqarýshy ádilet kishi keńesshisi Arman Kenjebekov baıqaýǵa qatysýshylarǵa ádil baǵasyn berip, tórelik etti.
Baıqaýdyń ekinshi kezeńi Astana qalalyq ІІD-niń tırinde jalǵasty. Bul jerde qyzmetkerler atys daıarlyǵynan baq synasty. Qarý qoldanýdy meńgerý - departament qyzmetkerleriniń eń basty mindeti. Mine osyndaı básekede kúsh synasqan er-azamattardyń arasynda qyz-kelinshekter de boldy. Solarmen ıyqtaryn tirestirip turyp, kúsh-qaýqaryn salystyrǵan názik jandylar - Saryarqa aýdandyq Іshki ister basqarmasy tergeý bóliminiń tergeýshisi, polıtsııa leıtenanty Dınara Moldageldınova jigitterdiń arasynda joǵary kórsetkish kórsetti. Nátıjesinde jeńimpazdar baǵaly syılyqtarmen dıplomdarmen marapattaldy. Bul kún osy sharamen aıaqtalyp qana qoıǵan joq.
Sondaı-aq qalalyq ishki ister departamentinde ákimshilik memlekettik qyzmetshilerdiń saltanatty ant qabyldaý rásimi ótkizildi. Qazaqstan Respýblıkasynyń Ánuranymen bastalǵan bul rásimge Astana qalalyq Іshki ister departamenti bastyǵynyń orynbasary polıtsııa polkovnıgi Baqytjan Beıseev, Departament Ardagerler keńesiniń tóraǵasy Esim Tanabergenov jáne elordalyq garnızonnyń jeke quramy qatysty. Іshki ister departamentiniń murajaıynda mundaı shara jıi ótkiziledi. Osylaısha departament qabyrǵasynda bir kúnniń ishinde birneshe shara ótip, elordalyq saqshylar Konstıtýtsııa kúnin merekeleýge óz úlesterin qosty. Al erteń Departamenttiń májilis zalynda qyzmetkerlerge úlken kontsert uıymdastyrylyp, dastarhan jaıylady.