Astana qalalyq ІІD basshysy qar ústindegi belbeý kúresi boıynsha alǵashqy Azııa chempıonyn quttyqtady
STANA. Sáýirdiń 2-si. QazAqparat - Búgin Astana qalalyq ІІD bastyǵy, polıtsııa polkovnıgi Marat Demeýov elordada ótken qar ústindegi belbeý kúresi boıynsha alǵashqy Azııa chempıonatynda bas júldeni ıemdengen Jol polıtsııasy basqarmasynyń qyzmetkeri Talǵat Qojabaevty quttyqtady. Bul aqparatty atalǵan vedomstvonyń til saıasaty jáne aqparat bólimi taratyp otyr.
Ústimizdegi jyly naýryzdyń 19-22-si aralyǵynda Qazaqstan, Úndistan, Pákistan, Qytaı, Tájikstan, Mońǵolııa, Qyrǵyz Respýblıkasy syndy 12 memleket sportshylarynyń qatysýymen qar ústindegi belbeý kúresi boıynsha alǵashqy Azııa chempıonaty ótkizilgen bolatyn. Osy jarystar barysynda 100 keliden joǵary salmaqta kúresken T.Qojabaev bas júldeni jeńip alyp, arnaıy kýbokpen jáne dıplommen marapattaldy. Bul Qazaqstannyń eki márte chempıony T.Qojabaevtyń halyqaralyq deńgeıdegi alǵashqy jeńisi emes. Ol 2008 jyly Afrıkanyń Togo eliniń Lome qalasynda ótken belbeý kúresinen álem chempıonatynda da jeńiske jetken bolatyn.
Belbeý kúresi - tatar halqynyń ulttyq sport túri, onyń negizgi qaǵıdasy - qarsylasty 3 mınýttyń ishinde jyǵyp qulatý.
Sporttyń qaı túrin bolmasyn meńgerý búgingi polıtsııa qyzmetkeriniń el aldyndaǵy boryshyn atqarý, qoǵamdyq tártipti qorǵaý, quqyq buzýshylyqty boldyrmaý, azamattardyń zańdy múddelerin qorǵaý kezinde asa qajet. Qyraǵylyq, kúshtilik, tózimdilik - osy qasıetterdiń barlyǵy ishki ister organdary qyzmetkeriniń boıynan tabylýy tıis.
