Astana qalalyq densaýlyq saqtaý basqarmasynyń jańa jetekshisi E.Baıjúnisovke tósbelgi tabystaldy
ASTANA. QazAqparat - Búgin Astana qalalyq ákimdiginde QR Densaýlyq saqtaý jáne áleýmettik damý birinshi vıtse-mınıstri Salıdat Qaıyrbekova Astananyń densaýlyq saqtaý basqarmasynyń jańadan taǵaıyndalǵan jetekshisi Erık Baıjúnisovke kásibı eńbegi úshin tósbelgi tabystady.
«Biz burynǵy vıtse-mınıstrimiz Erık Ábenulynyń túıindemesi men ómirbaıanyn taǵy bir ret qarap shyqtyq. Onyń ómirbaıanyn bilesizder, ol aımaqtardaǵy densaýlyq saqtaý salasyna basshylyq etken. Bul azamatqa densaýlyq saqtaý júıesindegi úlken jetistikteri úshin áli kúnge tósbelgi berilmegeni belgili boldy. Eńbegińizge rahmet aıtamyz», - dedi Salıdat Qaıyrbekova.
E.Baıjúnisovke Ulttyq kásipkerler palatasy jáne Ulttyq densaýlyq saqtaý palatasynyń atynan kásibı jetistikteri úshin taǵy bir medal tabystaldy.
E.Baıjúnisov Astana qalasy densaýlyq saqtaý basshysynyń mindetterin atqarýshy qyzmetin atqarǵan. Buǵan deıin ol Densaýlyq saqtaý vıtse-mınıstri qyzmetinde boldy (2010-2014 jj.). 2008-2010 jyldar aralyǵynda Soltústik Qazaqstan oblysy basqarmasynyń bastyǵy, al oǵan deıin Almaty oblysy densaýlyq saqtaý basqarmasy bastyǵynyń emdeý jumysy boıynsha birinshi orynbasary laýazymyn atqardy.
