Astana qalalyq Bilim basqarmasy «Qosh keldiń, Áz Naýryz!» merekesin ótkizdi
ASTANA. 18 naýryz. QazAqparat/Aınur Kenebaeva/ - Elordamyzda Astana qalasy ákimdiginiń basqarmalary arasynda Naýryz meıramyn merekeleý boıynsha baıqaý ótip jatyr.
Baıqaý aıasynda Astana qalalyq Bilim basqarmasynyń qyzmetkerleriniń uıymdastyrýymen búgin №65 orta mektepte «Qosh keldiń, Áz Naýryz!» atty merekelik shara bolyp ótti.
Bilim basqarmasy bastyǵynyń orynbasary Rımma Imanǵazınovanyń málimdeýinshe, Naýryz meıramyn merekeleý baıqaýyna bilim, densaýlyq saqtaý, ishki saıasat, ekonomıka jáne bıýdjettik josparlaý syndy Astana qalasy ákimdiginiń barlyq basqarmalary qatysýda.
«Astana qalasy bilim basqarmasy «Qosh keldiń, Áz Naýryz!» merekesin ótkizý arqyly halqymyzdyń ejelden jelisi úzilmeı jetken kóne salt- dástúrleri men ádet-ǵuryptaryn nasıhattaýdy maqsat etti», - dedi Rımma Imanǵazınova óz sózinde.
Merekelik shara barysynda qolóner buıymdarynyń kórmesi uıymdastyrylyp, «Naýryz kóje - Naýryzdyń yrym asy», «Quda - myń jyldyq, kúıeý - júz jyldyq», «Salt- dástúr - ata dástúr», «Úıirimen - úsh toǵyz» atty tórt bólim boıynsha tusaý keser, quıryq-baýyr asatý, naýryz kóje ázirleý syndy darqan dala bolmysynyń kórkem aıshyqtary sahnalyq qoıylym retinde jurtshylyq nazaryna pash etildi. Ulttyq án, bı, kúı óneri nasıhattalyp, ulttyq oıyndar oınaldy.
Qozy Kórpesh-Baıan sulý, Qyz Jibek, Aıman-Sholpan, Abaı beınelerin sharaǵa jumyldyrylǵan mektep oqýshylary sheberlikpen somdap, merekeniń qaıtalanbas sán-saltanatyna ónerlerimen ózgeshe órnek qosty.
