«Astana qalalyq balalar úıi» memlekettik mekemesindegi 22 balanyń jeke is-qaǵazdary tolyq qamtylmaǵan - prokýratýra
ASTANA. Tamyzdyń 13-i. QazAqparat /Aıdar Ospanalıev/ - «Astana qalalyq balalar úıi» memlekettik mekemesindegi 22 balanyń jeke is-qaǵazdary tolyq qamtylmaǵan.
Bul týraly búgin qamqorshylyq jáne qorǵanshylyq organdarynyń qyzmetine baılanysty tekserýlerdiń nátıjeleri boıynsha jýrnalıstermen kezdesken Astana qalalyq prokýrorynyń kómekshisi Olga Ionova málim etti.
Onyń málimetterine qaraǵanda, atalmysh mekemede balalardyń múliktik quqyqtaryna baılanysty da zańbuzýshylyqtar oryn
alýda. Onyń mysaldaryna qaraǵanda, maýsymnyń 1-i kúni Bilim basqarmasynyń buıryǵymen balalar úıine 13 jasar Krıstına Gerber ornalastyrylǵan. Onyń sheshesi 2007 jyly qaıtys bolǵan. Al ákesi bas bostandyǵynan aıyrý oryndarynda jatyr. Krıstına balalar úıine ornalastyrylǵanǵa deıin onyń otbasynyń jyljymaıtyn múlki bolǵan. Azamattyq kodeks talaptary boıynsha Krıstına osy múliktiń murageri bolýǵa quqyly. Alaıda balalar úıiniń ákimshiligi qajetti qujattardy quzyrly organdarǵa usynbaǵan. «Osy tektes zańbuzýshylyqtar V.S.Bardt atty azamatqa qatysty oryn alǵan. Onyń asyraýshysynan aıyrylǵandyǵyna baılanysty memleketten alýy tıis járdemaqy taǵaıyndalmaǵan», dedi prokýrordyń kómekshisi.
