Astana qalalyq aýmaqtyq saılaý komıssııasynyń músheleri saılandy
ASTANA. QazAqparat - Qalalyq máslıhattyń reglamentine sáıkes 15 qańtarda Astana qalasynyń saılaý komıssııalary músheleriniń ókilettikteriniń aıaqtalýyna baılanysty altynshy shaqyrylǵan Astana qalasy máslıhatynyń kezekten tys sessııasy ótti, dep habarlaıdy QazAqparat.
Máslıhat qalanyń saılaý komıssııalarynyń jańa quramyn qalyptastyrý boıynsha uıymdastyrý jumystaryn júrgizdi. Osy jumys aıasynda qalalyq máslıhat depýtattary men máslıhat apparatynyń qyzmetkerlerinen Astana qalasynyń aýmaqtyq, ýchaskelik saılaý komıssııalarynyń múshelerin saılaý jónindegi Ýaqytsha komıssııa quryldy.
Budan basqa, qalalyq baspasóz basylymdarynda jáne máslıhat saıtynda saılaý komıssııalaryn qurý tártibi týraly habarlama ornalastyryldy, saılaý komıssııalarynyń ornalasqan jeri men olardyń quramy boıynsha usynystar berý merzimi kórsetilgen tizbesi jarııalandy.
Astanada 309 saılaý komıssııasy, onyń ishinde bes aýmaqtyq (qalalyq jáne 4 aýdandyq), 304 ýchaskelik saılaý komıssııasy, sonymen qatar, Qazaqstan Respýblıkasynyń shetelderdegi ókilettikteri janyndaǵy 65 saılaý komıssııasy jáne Astana aýmaǵyndaǵy 239 saılaý komıssııasy quryldy.
Aýmaqtyq komıssııalar 7 adamnan turady, QR ókildikteriniń janynda ýchaskelik saılaý komıssııalary 5 adamnan, ýchaskelik komıssııalar osy saılaý ýchaskesindegi saılaýshylardyń sanyna baılanysty jeti adamnan on bir adamǵa deıin qurylady. Komıssııanyń ókilettik merzimi 5 jyldy quraıdy.
Máslıhatqa barlyǵy kandıdatýralar boıynsha 2 833, onyń ishinde saıası partııalardan 1 109, qoǵamdyq birlestikterden - 1 399, qalalyq saılaý komıssııalarynan 325 usynys tústi.
Saılaý komıssııalarynyń quramyna usynylatyn kandıdattardyń tizimin bes saıası partııa: «Nur Otan», «Aq jol» DKP, «Aýyl» Qazaqstan áleýmettik - demokratııalyq partııasy, «Birlik», KHKP, sondaı-aq, 12 qoǵamdyq birlestik pen qalalyq saılaý komıssııasy usyndy.
Saıası partııalar men qoǵamdyq birlestikter saılaý komıssııalary músheleriniń quramy boıynsha usynystar engizý kezinde merıtokratııa, jumysta sabaqtastyq jáne jastardyń saılaý komıssııalarynyń jumysyna qatysýy esebinen jańartý qaǵıdattary eskerildi, genderlik teńdik saqtaldy.
Astana qalasy máslıhatynyń sheshimderimen Astana qalasynyń aýmaqtyq saılaý komıssııasynyń, tórt aýdandyq saılaý komıssııalarynyń, Astana qalasynyń aýmaǵynda ornalasqan 239 ýchaskelik saılaý komıssııasynyń jáne Qazaqstan Respýblıkasynyń shetelderdegi ókilettikteri janynda qurylǵan 65 ýchaskelik saılaý komıssııasynyń músheleri saılandy.
