Astana qalalyq Ádilet departamenti qaladaǵy barlyq zańgerlerdiń basyn qosyp, úılestirý keńesin ótkizbek
ASTANA. 27 sáýir. QazAqparat /Aıdar Ospanalıev/ - Mamyr aıynda Astana qalalyq Ádilet departamenti qaladaǵy barlyq zańgerlerdiń basyn qosyp, úılestirý keńesin ótkizbek. Bul týraly búgin jýrnalıstermen bolǵan brıfıngte Astana qalalyq Ádilet departamentiniń bastyǵy Erbolat Balǵabaev málim etti.
Onyń sózine qaraǵanda, Ádilet departamenti osy ýaqytta atalǵan úılestirý keńesinde talqylanatyn birneshe taqyrypty talqylaýda. «Búginde quqyq qoldaný salasynda qandaı máseleler bar olardyń barlyǵyn birlesip otyryp, oı eleginen ótkizýimiz kerek. Aıtalyq, búginde elimizde qyzmet etip jatqan normatıvti - quqyqtyq aktilerdi tirkeý bólimi bar. Desek te normatıvti-quqyqtyq akti men quqyqtyq aktini shatastyratyn zańgerler bar. Quqyqtyq memleket retinde bizge osyndaı máselelerdi birige otyryp, ortaǵa salýǵa ne kedergi? Osy sebepti biz osyndaı úlestirý keńesin uıymdastyrýdy jón sanap otyrmyz»,-dedi departament bastyǵy.
Onyń aıtýynsha, jıyn barysynda ádilet salasynyń qyzmetine baılanysty kóptegen máseleler talqylanady. Qazirgi tańda olar sarapqa salynýda, sondaı-aq onda kóptegen qyzyqty derekter jarııa etiletin bolady.
