Astana sotynyń jańa tóraǵasy taǵaıyndaldy
ASTANA. KAZINFORM — Joǵarǵy Sot tóraǵasy Aslambek Merǵalıev elorda sýdıalaryna Astana qalalyq sotynyń jańa tóraǵasy Aıdar Smaǵulovty tanystyrdy. Bul qyzmetke taǵaıyndalǵanǵa deıin ol Aqtóbe oblystyq sotynyń tóraǵasy qyzmetin atqarǵan.
Kezdesýge Astana qalasynyń ákimi Jeńis Qasymbek, elorda sottarynyń sýdıalary men qyzmetkerleri, sondaı-aq quqyq qorǵaý jáne memlekettik organdardyń ókilderi qatysty. Іs-sharaǵa qatysýshylarǵa elorda sotynyń jańa tóraǵasyn tanystyra otyryp, A.Merǵalıev onyń kásibı tájirıbesin, basqarýshylyq qabiletterin jáne sýdıalar qaýymdastyǵyndaǵy bedelin atap ótti.
Joǵarǵy Sot tóraǵasy elorda memleketimizdiń iri saıası, ákimshilik jáne iskerlik ortalyǵy ekenin, munda kúrdeli ári qoǵam úshin mańyzdy isterdiń edáýir bóligi qaralatynyn alǵa tartty.
Osyǵan baılanysty elorda sottarynyń qyzmeti joǵary jaýapkershilikti, kásibılikti jáne sot praktıkasynyń birkelkiligin qamtamasyz etýdi talap etedi. Astana sýdıalar korpýsynyń aldyna qoıylǵan negizgi mindetterdiń qatarynda sot tóreligin júzege asyrý sapasyn arttyrý jáne qoǵamnyń sot júıesine degen senimin nyǵaıtý bar. A.Merǵalıev A.Smaǵulov sottardyń tıimdi jumys isteýine jáne olardyń odan ári damýyna eleýli úles qosatynyna senim bildirdi.
Aıdar Smaǵulov 1973 jyly Soltústik Qazaqstan oblysy, Blagoveşenka aýylynda dúnıege kelgen. 2001 jyly Qazaq memlekettik zań akademııasyn támamdaǵan.
2001-2004 jyldar — Soltústik Qazaqstan oblysy sottary ákimshiliginiń qurylymdyq bólimshelerinde qyzmet atqarǵan;
2004-2010 jyldar — Petropavl qalalyq sotynyń, Petropavl qalasynyń № 2 sotynyń sýdıasy;
2010-2014 jyldar — Soltústik Qazaqstan oblysy M.Jumabaev aýdandyq sotynyń tóraǵasy;
2014-2017 jyldar — Soltústik Qazaqstan oblystyq sotynyń sýdıasy;
2017-2023 jyldar — Soltústik Qazaqstan oblystyq sotynyń azamattyq ister jónindegi sot alqasynyń tóraǵasy;
2023 jyldan 2026 jylǵy 4 naýryzǵa deıin — Aqtóbe oblystyq sotynyń tóraǵasy.
Buǵan deıin Abaı oblysy Qurylys basqarmasynyń basshysy taǵaıyndalǵanyn jazǵanbyz.