Astana IT University-de bilim granty aınalasynda daý shyqty — mınıstrlik ne deıdi

ASTANA. KAZINFORM — Áleýmettik jelide Astana IT University janyndaǵy kolledjdiń túlekteri bilim grantyna ótinim berýge qatysty shaǵymdanyp jatyr.

Túlekterdiń shaǵymyna qulaq assaq, olar grantqa tikeleı ýnıversıtetke qujat tapsyra almaǵan. Shaǵymdanýshylardyń aıtýynsha, IT University janyndaǵy kolledjdi tańdaǵanda, bolashaqta oqýdy sol ýnıversıtette jalǵastyrýdy josparlaǵan.

Biraq, keıin belgili bolǵandaı, TjKB boıynsha UBT nátıjesimen olarǵa tek eki JOO-ǵa ǵana grantqa úmitker bolý múmkindigi berilgen, ıaǵnı QazTÝTB (KazÝTB) jáne Esil ýnıversıteti. Bul týraly túlekter test tapsyrǵannan keıin ǵana bilgen. 

Osy oraıda Ǵylym jáne joǵary bilim mınıstrligi Astana IT University-degi jaǵdaıǵa qatysty túsinikteme berdi.

— Qazir bilim granty konkýrsyna talapkerlerden ótinim qabyldanyp jatyr. Qujattardy qabyldaý 13 shildede bastaldy, 20 shildege deıin jalǵasady. Talapkerler 4 bilim berý baǵdarlamasyn jáne 4 joǵary oqý ornyn tańdaı alady. Bıyl «Astana IT University»-de qysqartylǵan oqý nysany boıynsha kadr daıarlaýǵa memlekettik tapsyrys ýnıversıtettiń ótinimdi durys toltyrmaýyna baılanysty ornalastyrylǵan joq, — delingen resmı habarlamada.

Aıta keteıik, bıyl memlekettik grant konkýrsyna qatysý úshin ótinishter qabyldaý 12 shildede bastaldy. 

Ǵylym jáne joǵary bilim mınıstrliginiń 14 shildedegi málimetinshe, 10 myńnan asa talapker grant konkýrsyna qatysý úshin qujat tapsyrdy.