Astana IT University stýdenti JI-ge qupııa derekterdiń taralýyna tosqaýyl bolatyn júıe ázirledi
ASTANA. KAZINFORM — Astana IT University stýdenti Aıǵanym Týlebaeva jasandy ıntellekt servısterine korporatıvtik qupııa derekterdiń taralýyn boldyrmaýǵa arnalǵan ExoAI júıesin ázirledi. Joba qupııa aqparatty qorǵap, kıbershabýyldardy anyqtaýǵa baǵyttalǵan. Bul týraly Ǵylym jáne joǵary bilim mınıstrligi málim etti.
AI-Sana kórmesi aıasynda Astana IT University stýdenti Aıǵanym Týlebaeva korporatıvtik úderisterde úlken tildik modelderdi (LLM) paıdalaný kezindegi kıberqaýipsizdikti arttyrýǵa baǵyttalǵan ExoAI jobasyn tanystyrdy. Bul sheshim qupııa aqparattyń syrtqy jasandy ıntellekt servısterine berilýine jol bermeýge jáne korporatıvtik derekterdiń taralyp ketý qaýpin azaıtýǵa múmkindik beredi.
Búginde jasandy ıntellekt quraldary shaǵyn jáne orta bızneste de, qarjy sektoryndaǵy uıymdardy qosa alǵanda iri kompanııalarda da keńinen qoldanylady. Olardyń kómegimen qyzmetkerler kúndelikti qaıtalanatyn mindetterdi avtomattandyryp, jumys tıimdiligin arttyrady. Sonymen qatar ashyq JI-servısterdi paıdalaný aqparattyq qaýipsizdik salasynda jańa syn-qaterler týyndatady. Atap aıtqanda, neırojelilermen jumys isteý kezinde qyzmetkerler jeke derekterdi, banktik derektemelerdi jáne korporatıvtik mańyzy bar ózge de qupııa aqparatty baıqaýsyzda syrtqy servısterge jiberýi múmkin.
ExoAI – Zero Trust («nóldik senim») qaǵıdaty boıynsha jumys isteıtin, kompanııanyń ishki ınfraqurylymy men syrtqy úlken tildik modelder arasynda aralyq býyn qyzmetin atqaratyn proksı-server. Júıe jiberiletin derekterdi taldap, qupııa aqparatty anyqtaıdy jáne ony qorǵalǵan tokendermen nemese shıfrlanǵan belgilermen almastyrady. Osylaısha, bastapqy derekter ashyq kúıinde jarııa tildik modelge berilmeıdi.
Budan bólek, sheshim kúmándi áreketter men qorǵanys tetikterin aınalyp ótý áreketterin, sonyń ishinde jailbreak-shabýyldaryn anyqtaýǵa kómektesetin habarlandyrý júıesin qamtıdy. Bul kompanııalarǵa yqtımal qaýipterge der kezinde áreket etip, jasandy ıntellekt quraldaryn qaýipsiz paıdalaný tetikterin jetildirýge múmkindik beredi.
Aıǵanym Týlebaevanyń aıtýynsha, jobanyń negizgi mindetteriniń biri – qorǵanys tetikterin Qazaqstanda qoldanylatyn korporatıvtik derekter men formattarǵa, sonyń ishinde bıznes-sáıkestendirý derekteri men banktik derektemelerge beıimdeý. Mundaı tásil sheshimdi otandyq bıznes jaǵdaıynda qoldaný múmkindigin keńeıtýge baǵyttalǵan.
— Búginde jasandy ıntellekt kúndelikti jumys úderisteriniń bir bóligine aınalyp keledi. Sondyqtan ony qaýipsiz paıdalanýdy qamtamasyz etý mańyzdy. ExoAI kompanııalarǵa derekterdiń qupııalylyǵyn saqtaı otyryp, úlken tildik modelderdiń múmkindikterin paıdalanýǵa kómektesedi. AI-Sana kórmesine qatysý arqyly óz jobamdy tanystyrýǵa, basqa tehnologııalyq ázirlemelermen tanysýǵa, keri baılanys alýǵa, sondaı-aq sheshimdi odan ári damytý úshin áleýetti ınvestorlar men seriktester tabýǵa múmkindik aldym, – dedi joba avtory.
AI-Sana kórmesine qatysý jas ázirleýshilerge ózderiniń tehnologııalyq sheshimderin tanystyrýǵa, tájirıbe almasýǵa jáne bıznes ókilderimen, ınvestıtsııalyq qaýymdastyqpen baılanys ornatýǵa jol ashady. ExoAI jobasy kıberqaýipsizdik salasyndaǵy bilimdi tsıfrlyq transformatsııanyń ózekti mindetterin sheshýge jáne jasandy ıntellektini jaýapkershilikpen engizýge qoldanýdyń naqty úlgisin kórsetedi.
Eske sala keteıik, elimizdegi derekterdi óńdeý ortalyqtaryn damytýǵa 10 mlrd dollar ınvestıtsııa tartylady.
