Astana IT University Massachýsets tehnologııalyq halyqaralyq baǵdarlamasyna qosyldy
ASTANA.KAZINFORM- Astana IT University (AITU) resmı túrde álemdegi eń myqty tehnologııalyq ýnıversıtetterdiń biri – Massachýsets tehnologııalyq ınstıtýtynyń (MIT) GLEEN (Global Learning & Entrepreneurship Network) halyqaralyq baǵdarlamasyna qosyldy, dep habarlaıdy oqý ornynyń baspasóz qyzmeti.
AITU alǵash bolyp jahandyq jelige qosyldy, bul Prezıdenttiń Qazaqstanda jasandy ıntellekt pen ınnovatsııalar salasyn damytýǵa arnalǵan ulttyq ambıtsııalaryn aıqyndaıdy. GLEEN MIT Soltústik Amerıka, Eýropa, Afrıka jáne Latyn Amerıkasyndaǵy ýnıversıtetterdi biriktiretin halyqaralyq qaýymdastyq retinde damyp keledi, al AITU-dyń qosylýy-ýnıversıtettiń áleýetin jahandyq deńgeıde moıyndaý.
Seriktestiktiń ereksheligi AITU tek jeke kýrstarǵa ǵana emes, túgel ıntegratsııalanǵan transformatsııalyq «operatsııalyq júıege» ıe bolady, bul ınnovatsııalar men kásipkerlikti oqytý tásilin túbegeıli ózgertedi.
MIT ádistemeleri Disciplined Entrepreneurship (24 qadam) jáne 15 Startup Tactics bakalavr, magıstratýra jáne ýnıversıtet akseleratorlary úshin jańartylǵan oqý modýliniń negizin quraıdy.
Baǵdarlama eki negizgi baǵytta júzege asyrylady: qyzmetkerlerdiń kásibı áleýetin arttyrý jáne stýdentterdiń halyqaralyq standarttar boıynsha praktıkalyq daǵdylaryn damytý.
Train-the-Trainer baǵdarlamasy MIT ádistemelerine tereń praktıkalyq enýge múmkindik beredi, bul oqytýshylarǵa alǵan bilimin oqý protsesinde birden qoldanýǵa múmkindik beredi. Atalǵan baǵdarlama boıynsha AITU qyzmetkerleriniń alǵashqy toby 2026 jylǵy qańtarda MIT-de oqýǵa attanady. Jyl boıy oqytýshylar GLEEN onlaın-sessııalaryna qatysady, al jazda MIT bazasynda GLEEN Strategy & Challenge-Solving strategııalyq vorkshopy ótedi, onda halyqaralyq tálimgerlermen birge AITU startap-ekojúıesin damytý jol kartasy jasalady.
AITU stýdentteri jyl saıyn StartMIT ınnovatsııalyq ıntensıvine qatysý múmkindigine, sondaı-aq MIT Orbit jáne Jetpack AI tsıfrlyq platformalaryna tolyq qatysa alady. Bul platformalar stýdentterge gıpotezalar, qundy usynystar jáne bıznes-modelder ázirleýge múmkindik beredi. Osylaısha, kásipkerlik daǵdylar ýnıversıtettiń árbir stýdenti úshin qoljetimdi jáne keńinen taralǵan daǵdyǵa aınalady.
Astana IT University rektory Altaır Ahmetov: «GLEEN MIT baǵdarlamasyna qosylý — ulttyq deńgeıdegi mańyzdy qadam. AITU ınnovatsııalardy qalyptastyratyn jahandyq bilim qozǵalysynyń bir bóligine aınalady. Bul stýdentterimiz ben oqytýshylarymyzǵa MIT ádistemeleri boıynsha jumys jasaýǵa, álemdik deńgeıdegi startaptardy qurýǵa jáne Qazaqstannyń bilim jáne ınnovatsııalyq ekonomıkasyna úles qosýǵa múmkindik beredi»-dedi.
MIT-pen seriktestik AITU halyqaralyq mártebesin nyǵaıtyp, jańa áriptestik, ǵylymı zertteý jáne ınvestıtsııalyq múmkindikter ashady, ýnıversıtettiń Qazaqstan men Ortalyq Azııadaǵy ınnovatsııalyq damýdyń negizgi draıverleriniń biri retindegi rólin rastaıdy.
Osyǵandeıin Qazaqstannyń Coursera sheshimi negizinde ulttyq tsıfrlyq bilim berý platformasyn qurǵaly otyrǵanyn jazdyq.