«Astana – Yrǵyz» kólik joly elimizdiń tranzıttik áleýetin damytýdyń negizgi kezeńi bolmaq
ASTANA. KAZINFORM - Qostanaı oblysynda «QazAvtoJol» ulttyq kompanııasy» AQ Basqarma tóraǵasy Darhan Imanashev, oblys ákimi Qumar Aqsaqalov, merdiger uıymdardyń ókilderi men jobalaýshy ınjenerlerdiń qatysýymen jınalys ótti.
Kezdesý barysynda respýblıkalyq mańyzy bar «Astana – Yrǵyz» avtomobıl jolynyń qurylysy talqylandy.
Memleket basshysy Qasym-Jomart Toqaevtyń 2025 jylǵy 14 naýryzda ótken Ulttyq quryltaıdyń IV otyrysynda bergen tapsyrmasyna sáıkes, QR Kólik mınıstrligi, «QazAvtoJol» ulttyq kompanııasy» AQ jáne Qostanaı oblysynyń ákimdigi iri ınfraqurylymdyq jobany júzege asyryp jatyr.
Joba aıasynda uzyndyǵy 890 shaqyrym bolatyn «Astana – Arqalyq – Torǵaı – Yrǵyz» baǵyty boıynsha avtojoldyń qurylysy men qaıta jańartý jumystary qarastyrylǵan.
Atalǵan joba strategııalyq mańyzǵa ıe. Sebebi ol Transkaspıı halyqaralyq kólik marshrýtyna (TMTM) tikeleı shyǵýdy qamtamasyz etip, Qazaqstannyń ortalyq jáne batys óńirleri arasyndaǵy kólik baılanysyn nyǵaıtpaq.
Jobany júzege asyrý elimizdiń tranzıttik áleýetin arttyryp, halyqaralyq tasymaldaýdaǵy básekege qabilettiligin kúsheıtedi. Sonymen qatar, jol elimizdiń «ońtústik qaqpasy» sanalatyn Qorǵastan Aqtaý teńiz portyna deıingi mańyzdy baǵytty qalyptastyratyn bolady. Osy joba aıasynda Astana men Yrǵyz aýyly arasyndaǵy araqashyqtyq 573 shaqyrymǵa qysqaratyn bolady.
Bul júkterdi jetkizý jyldamdyǵyn arttyryp, tasymal shyǵyndaryn azaıtýǵa, sonymen birge jańa múmkindikterdiń ashylýyna yqpal etedi. Joldyń boıynda qurylys pen paıdalaný kezeńderinde jańa jumys oryndary ashylyp, óńirlerdiń áleýmettik-ekonomıkalyq damýyna qosymsha serpin bermek.
«QazAvtoJol» UK» AQ Basqarma tóraǵasy Darhan Imanashev jobanyń el úshin mańyzdy ekenine toqtalyp, bylaı dedi: «Astana – Yrǵyz» avtojolynyń qurylysy – bul jaı ǵana kólik jobasy emes. Bul óńirlerdiń ornyqty damýynyń, Qazaqstannyń tranzıttik áleýetin nyǵaıtýdyń jáne elimizdiń halyqaralyq logıstıkalyq rólin arttyrýdyń negizi. Bul baǵyt óńirlerdi biriktiretin strategııalyq arterııaǵa aınalyp, ekonomıka men halyq úshin jańa múmkindikterge jol ashady».
-Osylaısha, «Astana – Yrǵyz» avtomobıl jolynyń qurylysy Memleket basshysy qoıǵan mindetterdi oryndaýǵa jáne Qazaqstannyń kólik-logıstıkalyq júıesin uzaq merzimdi damytýǵa baǵyttalǵan basym jobalardyń biri,-delingen habarlamada.
Aıta keteıik, osyǵan deıin Prezıdent Úkimetke «Torǵaı - Yrǵyz» jáne batys baǵytyndaǵy qurylysty jedeldetýdi tapsyrǵan bolatyn.