Astana irgesindegi órttiń sebebin arnaıy komıssııa anyqtaıdy
ASTANA. QazAqparat – Parlament palatalarynyń birlesken otyrysynan keıin BAQ ókilderiniń saýalyna jaýap bergen Tótenshe jaǵdaılar mınıstri Syrym Sháriphanov Astana irgesindegi órttiń sebebi týraly pikir bildirdi, dep habarlaıdy QazAqparat tilshisi.
Onyń aıtýynsha, elordanyń irgesindegi órtti jyldam aýyzdyqtaýǵa jel kedergi keltirgen.
«Jel otty jalyndatyp, tútindi qoıýlatyp jiberdi. Ondaı órtti sýmen ǵana óshirý múmkin bolmady. Áıtpese oqıǵa ornynda tehnıka men adam jetkilikti boldy», - dedi mınıstr.
Sondaı-aq, ol órttiń tutanýyna ne sebep bolǵany áli beımálim aıtty.
«Onyń bárin arnaıy qurylǵan komıssııa aıta alady. Bul jerde faktor kóp. Bireý tastaǵan temeki tuqylynan da tutanýy múmkin. Dalada jatqan shyny qutynyń optıkalyq qubylysynan da shyǵýy yqtımal. Bálkim bireý ádeıi órtegen de shyǵar. Bári múmkin», - dedi Syrym Sháriphanov.
Eske sala keteıik, munyń aldynda Tótenshe jaǵdaılar mınıstri elorda mańyndaǵy órtti sóndirýge eki apta ýaqyt kerek ekenin aıtqan edi.
