Astana irgesindegi 20 eldi mekende gaz tartý jumystary bastalady
KÓKShETAÝ. QazAqparat - 2019 jyldan Aqmola oblysynyń Arshaly jáne Tselınograd aýdandarynyń 130 myń adam turatyn 20 eldi mekenine gaz tartý jumystary bastalady. Bul týraly aımaq basshysy Málik Myrzalın turǵyndar aldyndaǵy esepti kezdesýinde aıtty, dep habarlaıdy QazAqparat tilshisi.
Aımaq basshysynyń aıtýynsha, Astana mańyndaǵy aýdandardy gazdandyrý Memleket basshysynyń tapsyrmasymen aýqymdy «Saryarqa» magıstraldy gaz qubyryn tartý jobasy aıasynda iske aspaq.
«2019 jyldan Aqmola oblysynyń Arshaly jáne Tselınograd aýdandarynyń 130 myń adam turatyn 20 eldi mekenine gaz tartý jumystary bastalady. Qazirgi kezde gaz taratý jelisiniń 1-shi kezeńi boıynsha jobalyq smetalyq qujattamalardy ázirlenýde», dep atap ótti Málik Myrzalın.
Eske sala keteıik, «Qyzylorda - Qaraǵandy - Astana» magıstraldy gaz qubyrynyń 1-ýchaskesiniń qurylysy aıasynda 2019 jyly «Arshaly» avtomatty gaz úlestirý stansasynan, sondaı-aq «Astana» 1-shi jáne 2-shi avtomatty gaz úlestirý stansalarynan Arshaly, Tselınograd aýdandaryn gazdandyrý múmkindigi týyndaıdy.
