Astana - ınvestıtsııa salýǵa tıimdi qala

ASTANA. QazAqparat - Astanada VII Astana ekonomıkalyq forýmy ótip jatyr. Forým aıasynda V «Astana Invest 2014» halyqaralyq ınvestıtsııalyq forýmy uıymdastyryldy. Oǵan álemniń 100 jýyq elinen 130 mınıstr kelgen. Forým sheńberinde 70 jýyq is-shara ótedi. Bul týraly astana.gov.kz saıty habarlady.

Imanǵalı Tasmaǵambetov, Astana qalasynyń ákimi: «Elbasy Astanaǵa ınvestıtsııa tartý máselesine baza nazar aýdaryp keledi. Sodan da bolsa kerek, elordamyz qysqa merzimde ózin-ózi qamtamasyz ete alatyn qalaǵa aınaldy. Osy ýaqyt ishinde qala turǵyndarynyń sany úsh esege ósti. JІÓ-niń kólemi 54 esege artsa, JІÓ-degi elordanyń úlesi 6 eselendi. Investıtsııa 28 ese artty».

Sheteldik ınvestorlar úshin elordada barlyq jaǵdaı jasalǵan. Basqasyn aıtpaǵanda, salyq tólemi men kedendik baqylaýdyń jeńildetilgen túri bar. Arnaıy ekonomıkalyq aımaq ta jumys istep tur. Sondaı-aq, Astanada otyryp-aq, Kedendik odaqqa kiretin elderge qyzmet kórsetýge bolady.

Fılıberto Ntýtýmý Ngema, Reseı Federatsııasyndaǵy Ekvatorly Gvıneıa Respýblıkasynyń Tótenshe jáne Ókiletti Elshisi: «Astananyń ınfraqurylymy jolǵa qoıylypty. Bul ınvestorlar úshin basty qajettilik. Baıqaýymsha, ınvestorlar Astanaǵa kelip, jumys isteýge zor qyzyǵýshylyq bildirip otyr. Men de eki el arasyndaǵy yntymaqtastyqty damytyp, qarym-qatynasty myqtap jolǵa qoısam deımin».

Meder Máselov, «Astana - jańa qala» arnaıy ekonomıkalyq aımaǵy ákimshiliginiń basshysy: «Qazir Indýstrıaldyq parkte 50 joba júzege asyrylyp jatyr. Sonyń ishinde 20-sy iske qosyldy. Qala ákimdigi 2017 jylǵa 50 jýyq zaýytty paıdalanýǵa berip, 8500 tehnıkalyq maman ıesin jumyspen qamtymaq. Bul qalanyń kirisin arttyrýǵa óz septigin tıgizedi».

Forým aıasynda jalpy somasy 500 mln.dollar bolatyn 11 memorandýmǵa qol qoıyldy. Astanany «Aqyldy qalalar» reıtıngine engizý men qala ınfraqurylymyn «EXPO-2017» kórmesine daıyndaý máselesi keńinen qaraldy.