«Astana Innovations» basshysy elordadaǵy erekshe joba týraly aıtyp berdi
ASTANA. QazAqparat - «Astana Innovations» AQ basqarma tóraǵasy Oljas Sartaev elordadaǵy áleýmettik jáne ózge de máselelerdi sheshýge arnalǵan júıe týraly aıtyp berdi, dep habarlaıdy QazAqparat.
«Geoaqparattyq júıeni engizý boıynsha jobany iske asyrý bastaldy. Atap aıtqanda, biz Astanada bar ǵımarattar boıynsha málimetter bazasyn qalyptastyramyz, ıaǵnı áleýmettik nysandar sanatyndaǵy mektep, aýrýhana jáne emhanadan bastap, sonymen qatar turǵyn úılerdi, ınfraqurylymdy ári kóliktik toraptardy qamtımyz», - dep toqtaldy Oljas Sartaev «Astana - damý men ınnovatsııanyń 20 jyly» forýmynda.
Onyń sózine qaraǵanda, jınaqtalǵan málimetter biryńǵaı vırtýaldy kartada usynylady.
«Barlyq derekterdi kartada shoǵyrlandyrǵan kezde, qalanyń qaı aýdanynda mektep, aýrýhana jáne balabaqsha jetispeıtindigi týraly jaǵdaıdy jeńil anyqtaýǵa múmkin bolady. Munymen qosa, bul júıemen jol-kólik oqıǵalary men vırýstardyń jáne ınfektsııalardyń taralýy ahýalyna monıtorıng júrgizýge bolady», - dep naqtylady kompanııa basshysy.
Onyń aıtýynsha, geoaqparattyq júıe naqty málimetter negizinde shahardyń qaı bóliginde qajetti jumystardy kúsheıtý kerektigin anyqtap otyrady. Bul turǵyda qar tazalaýdy qajet etetin aýlalar men kósheler de naqty kórsetiledi.
«Osy múmkindikter arqyly balabaqsha men mektep qurylysyna suranys artyp otyrǵan jerler, qoǵamdyq kóliktiń jelisin ońtaılandyrýǵa qatysty máselelerge naqty baǵa beriledi. Júıede táýekelderge taldaý jasaý múmkindigi qalanyń ınvestıtsııalyq tartymdy aımaqtaryn anyqtaýǵa jol ashady, osy arqyly biz ınvestorlardyń tabystylyǵyna kepildik bere alamyz», - dep túıindedi sózin Oljas Sartaev.
