Astana Innovations Accelerator: baǵdarlamada tanystyrylǵan jobalar qalaǵa qandaı paıdasyn tıgizdi

Jaslan Mádıev: Jastardyń qundylyqtary tehnologııaǵa baǵyttalýy kerek

Atalǵan baǵdarlamanyń ashylý rásimine QR Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev qatysyp, ósip kele jatqan býynnyń qundylyqtaryn ózgertý qajettigin málimdedi.

Onyń sózinshe, jas urpaq zamanaýı ǵylym-bilim arqyly tyń jańalyqtar ashýǵa umtylǵany jón.

Al memleket olarǵa osy baǵytta jaǵdaı jasaýy qajet.

— Memleket basshysy tehnologııalyq ult qalyptastyrý mindetin tapsyrdy. Sondaı-aq, bul jyldy tsıfrlandyrý jáne jasandy ıntellekt jyly dep jarııalap, úsh jylda tolyqqandy tsıfrly memleketke aınalý maqsatyn qoıdy. Astana Hub, «Astana Innovations» jáne ózge óńirlerdegi basqa da akseleratorlar bastaǵan ınnovatsııalyq sektor jastardy tartyp, olardyń kózqarasy men oılaý júıesin ózgertetin ortalyq bolýy tıis. Bul baǵdarlamalar Astanada qalyptasyp, ary qaraı aımaqtarǵa keń taralýy kerek. Mundaı jobalar barlyq oblystaǵy daryndy jastardy, ıaǵnı búkil eldi qamtýyna mán beremiz. Jas býyn bolashaqta memlekettik qyzmetker nemese sheneýnik bolýdy emes, JI jáne tsıfrlandyrý salasyndaǵy jobalardyń, startaptardyń negizin qalaýshy, kásipker bolýdy armandaýy tıis. Biz jas urpaqtyń oı-órisin, dúnıetanymyn ózgertýge tyrysýymyz kerek, — dedi ol.

Budan bólek, sala mınıstri mundaı baıqaýlardyń mán-mańyzyna aıryqsha toqtaldy.

— Búginde elder arasyndaǵy básekelestik barǵan saıyn óz tehnologııalaryn ázirleý jáne olardy ekonomıkanyń negizgi salalaryna jedel engizý qabiletine táýeldi bolyp keledi. Sondyqtan biz úshin AI-ınfraqurylymdy damytý ǵana emes, sonymen qatar qýatty tehnologııalyq kompanııalardy qalyptastyrý da asa mańyzdy. Astana Innovations Accelerator ıdeıadan bastap naqty iske engizýge deıingi joldy qysqartyp, qazaqstandyq jobalar ekonomıkanyń ajyramas bóligine aınalýyna ári jahandyq naryqta tabysty básekege qabiletti bolýyna múmkindik beredi, — dedi ol.

340 ótinimnen 29 startap irikteldi

Sonymen qatar, is-sharada Astana qalasy ákiminiń orynbasary Evgenıı Glotov málimdeme jasady. Onyń sózinshe, Astana Innovations Accelerator baǵdarlamasy bıyl úshinshi ret uıymdastyrylyp otyr. Shahar ákimdigi tehnologııalar, jasandy ıntellekt jáne ınjenerııa salalaryndaǵy bastamalardy árdaıym qoldap keledi.

— Jyl saıyn ótkiziletin baǵdarlamanyń úshinshi legine bıyl qyzyǵýshylyq eki ese artyp, 340-tan astam ótinim qabyldandy. Bul — elordadaǵy ınnovatsııalyq ekojúıeniń qarqyndy damyp kele jatqanynyń aıqyn kórinisi. Tehnologııalyq qaýymdastyq Astanaǵa naqty sheshimder usynýǵa daıyn, al elorda óz kezeginde tyń ıdeıalardyń ónimge aınalyp, tájirıbede júzege asýyna qolaıly orta qalyptastyryp keledi, — dedi ol.

Evgenıı Glotovtyń aıtýynsha, Astana Innovations Accelerator baǵdarlamasynyń shahar ómirine orasan septigi tıedi. Onda tanystyrylyp, úzdik shyqqan jobalar men bastamalar ártúrli salalarǵa engizilip te jatyr.

— Ótken jyly 156 ótinimnen 22 joba irikteldi. Al 8 joba bilim berý, qaýipsizdik, densaýlyq saqtaý jáne áleýmettik qorǵaý salalarynda qalalyq ınfraqurylymǵa engizildi. Bul kórsetkishterdiń artynda mańyzdy mán jatyr. Qalalyq ınnovatsııalar endi jaı ǵana ıdeıa nemese pılottyq joba emes. Olar qala turǵyndarynyń kúndelikti ómirinde naqty nátıje berip, ómir sapasyn jaqsartýǵa qyzmet etip keledi, — dedi qala ákiminiń orynbasary.

Úzdik startaptarǵa halyqaralyq naryqqa jol ashylady

Al bıylǵy qatysýshylarǵa, tipti, halyqaralyq deńgeıge shyǵýǵa jol ashylyp otyr. Ózgelerden oq boıy ozyp shyqqan úmitkerler jobalaryn shetelderge baryp, pash ete alady.

— Úshinshi lek qatysýshylary úshin jańa múmkindikter bar. Bıyl Jasandy ıntellekt jáne tsıfrlyq damý mınıstrliginiń qoldaýymen akselerator alǵash ret halyqaralyq deńgeıge shyǵyp otyr. Úzdik komandalar óz jobalaryn Qytaı, AQSh jáne BAÁ elderindegi seriktes akseleratsııalyq baǵdarlamalarda tanystyrý múmkindigine ıe bolady. Startaptar úshin bul — jańa naryqtarǵa, saraptamaǵa, ınvestorlarǵa jáne halyqaralyq tehnologııalyq ekojúıelerge qol jetkizýdiń mańyzdy múmkindigi, — dedi Evgenıı Glotov.

«Aqyldy qala» baǵytyndaǵy startaptarǵa basymdyq berildi

Sonymen birge, jıynda Astana Hub-tyń bas dırektory Maǵjan Mádıev sóz alyp, baǵdarlamaǵa bıyl 29 startap qatysqanyn atap ótti. Onyń sózinshe, bıyl baıqaý «aqyldy» qala baǵytyna arnalyp otyr. Bul salada elordalyq mamandar jemisti jumys istep keledi. Buǵan deıin astanalyqtardyń atalǵan baǵyttaǵy startaptary ulttyq jáne halyqaralyq deńgeıge de shyqqan.

— Astana — bizdiń týǵan qalamyz. Munda turamyz jáne bala-shaǵamyzdy ósirip jatyrmyz. Sondyqtan «aqyldy» qala baǵytyndaǵy jobalar bárimiz úshin óte mańyzdy. Búginde Úkimet te, jergilikti atqarýshy organdar da, Astana Hub sekildi ınstıtýttar da saladaǵy jobalarǵa qajetti jaǵdaıdy jasap, jumys isteýge yńǵaıly ortany qalyptastyryp otyr, — dedi ol.

Endigi maqsat — IT eksportyn 2 mlrd dollarǵa jetkizý 

Sonymen qatar, Maǵjan Mádıev ótken jyly elimizdiń IT eksporty 1 mlrd dollardan asqanyn eske saldy. Onyń sózinshe, endigi kózdegen meje — atalǵan kórsetkishti 2 mlrd dollarǵa jetkizý.

— Qurmetti kásipkerler, qatysýshylar, sizderdiń kómegińizben jańa jetistikter men tabystarǵa jetemiz dep úmittenemiz, — dedi Astana Hub-tyń bas dırektory.

Astana Innovations Accelerator 2026 baǵdarlamasynyń ashylý rásiminde birqatar qujatqa qol qoıyldy. «Astana Innovations» AQ Growth Vision Pro Ltd jeke kompanııasy (Khan Tengri Innovation Hub operatory), Silkroad Innovation Hub jáne Presight AI Kazakhstan kompanııalary yntymaqtastyq týraly memorandým jasasty. Qujattar startaptardy akseleratsııalaý salasyndaǵy áriptestikti damytýǵa, tehnologııalyq jobalardy jetildirýge jáne saraptamalyq tájirıbe almasýǵa baǵyttalǵan. Sondaı-aq, olar Qytaı, BAÁ jáne AQSh seriktesteriniń tájirıbesi men halyqaralyq jelisin paıdalana otyryp, qazaqstandyq komandalardyń halyqaralyq akseleratsııalyq baǵdarlamalarǵa qatysý múmkindikterin keńeıtýge jol ashpaq.

Aıta keteıik, buǵan deıin Qazaqstanda AI-startaptar men zertteýlerdi qoldaýdyń jańa baǵdarlamalary iske qosylatynyn jazǵanbyz.