«Astana Innovation» basshysy «Sergek» kameralarynyń kemshiligin atady
ASTANA. QazAqparat - «Astana Innovation» AQ basqarma tóraǵasy Oljas Sartaev «Sergek» kameralary arqyly adamnyń jeke ómirine bas suǵý jaǵdaıy týyndaýy múmkin degen áńgimege pikir bildirdi, dep habarlaıdy «QazAqparat» HAA tilshisi.
«Kez kelgen dúnıeniń artyqshylyǵy men kemshiligi bolady. Biz eshbir kamera jeke ómirdiń sátterin túsirip ala almaıdy dep aıta almaımyz. Biraq, qalanyń qaýipsizdigi turǵysynan - bul álemdik tájirıbe. Kameralar eń aldymen, adamdar kóp jınalatyn oryndarǵa ornatylady», - dedi «QazAqparat» HAA tilshisine «Astana Innovation» AQ basqarma tóraǵasy Oljas Sartaev.
Ol sonymen qatar, jaǵdaıdyń mundaı sıpatta damýy sheneýnikterdiń adamı qasıetterine baılanysty bolatynyn atap ótti.
«Árıne, bireýdiń terezesine úńilý maqsaty joq. Memlekettegi kez kelgen quzyrly tulǵa teorııalyq turǵyda ony óz maqsatyna paıdalanýy múmkin. Bul kez kelgen sektorǵa baılanysty. 100 paıyz olaı bolmaıdy dep aıta almaımyz, biraq negizgi maqsat - bizdiń qala turǵyndarynyń qaýipsizdigi», - deıdi Sartaev.
Eske sala ketsek, «Sergek» vıdeobaqylaý júıesi kez kelgen adamnyń túrin tap basyp tanı alatyn bolady. Bul júıe Astananyń adam kóp jınalatyn oryndaryna ornatylatyn bolady.
