Astana ımamdary mektep oqýshylaryna UBT aldynda bata berdi
ASTANA. 24 mamyr. QazAqparat - Astana qalasynda «Nur Astana» ortalyq meshitiniń ımamdary birneshe jylǵy dástúrlerinen taımaı, Ulttyq biryńǵaı testileý aldynda mektep bitirýshi oqýshylarǵa batalaryn berdi.
«Bul sharanyń mańyzy zor. Sebebi musylman balasy árbir ıgi isin «bısmıllamen» bastaýy súnnet. Al, jastar bolashaǵynyń qamy eń ıgi shara. Jastarǵa ómirlik baǵyt-baǵdar berý aǵa býynnyń mindeti. Meshit ımamdary rýhanı sala qyzmetkerleri retinde mektep túlekterine bilim alý, ustazdy qurmetteý, eline paıdaly mamandyq ıesi ataný, tili men dilin ardaq tutý sııaqty otansúıginshik pen ımanı taqyryptar tóńireginde aǵalyq nasıhattaryn aıtty», - delingen meshittiń baspasóz qyzmeti taratqan aqparatta.
Elimizdiń basty meshitine elordadaǵy qazaq tildi 15 mektepten 50-ge jýyq muǵalimniń jetekshiligimen 672 bolashaq túlek keldi. Sársenbiniń sátindegi kezdesý Quran oqýmen bastaldy.
Tıláýattan keıin QMDB-nyń naıb múftıi, Astana qalasynyń Bas ımamy Qalıjan qajy Zańqoev oqýshylarǵa «Bilimdi myńdy jyǵar...» atty taqyrypta bilim alýdaǵy basty qaǵıdattar haqynda aıta kele: "Elimizdiń bolashaǵyn tek bilimdi de, bilikti mamandar qurady. Bilim barda - damý men órkendeý bar. Bilimsiz kemel keleshekti elestetý múmkin emes. Bilim men ǵylymǵa den qoıý arqyly biz elimizdiń de, ózimizdiń de bolashaǵymyzdy jarqyn da mándi etemiz", - dep atap ótti.
