Astana IKAO-nyń avıatsııalyq qaýipsizdik jónindegi mańyzdy alańyna aınalady
ASTANA. KAZINFORM – 20–22 qazanda Astana qalasynda Kólik mınıstrliginiń qoldaýymen IKAO-nyń Avıatsııalyq qaýipsizdik aptalyǵy ótedi. Bul — avıatsııalyq qaýipsizdik jáne kıberqaýipsizdik salasyndaǵy negizgi halyqaralyq is-sharalardyń biri.
Qazaqstan alǵash ret álemniń túkpir-túkpirinen avıatsııalyq ákimshilikterdiń basshylaryn jáne avıatsııa salasynyń ókilderin biriktiretin jahandyq forýmnyń ótkizý alańyna aınalady.
IKAO basshylardy, retteýshi organdardy, sala ókilderin jáne jetekshi sarapshylardy biriktiretin iri halyqaralyq is-sharalardy ótkizedi. Avıatsııalyq qaýipsizdik aptalyǵyn Astana qalasynda ótkizý Qazaqstannyń IKAO-men halyqaralyq yntymaqtastyǵy joǵary ekenin jáne ulttyq avıatsııalyq qaýipsizdik júıesin jetildirý baǵytynda júıeli jumys júrgizilip jatqanyn kórsetedi.
Avıatsııalyq qaýipsizdik salasyndaǵy halyqaralyq standarttarǵa sáıkestik kórsetkishi 95,7% bolatyn Qazaqstan álemdegi TOP-20 eldiń qataryna kiredi jáne qazirgi ýaqytta Ortalyq Azııa óńirindegi kóshbasshy el bolyp tabylady.
Óńirlik deńgeıdegi is-sharalardy ótkizýde mol tájirıbesi bar Qazaqstan endi jahandyq deńgeıge kóterilip otyr. Bul elimiz úshin de, halyqaralyq avıatsııa qaýymdastyǵy úshin de mańyzdy oqıǵa.
— «Kúrdeli álemdegi qaýipsiz aspan: barshaǵa arnalǵan avıatsııalyq qaýipsizdikti arttyrý» taqyrybynda ótetin IKAO-nyń Avıatsııalyq qaýipsizdik aptalyǵyna IKAO Keńesiniń Prezıdenti Toshııýkı Onýma men IKAO Bas hatshysy Hýan Karlos Salasardyń, sondaı-aq shet memleketter men halyqaralyq uıymdardyń joǵary laýazymdy ókilderiniń kelýi kútilýde, — delingen habarlamada.
Búginde azamattyq avıatsııa qaýipsizdik salasyndaǵy jyldam ózgerip jatqan orta jaǵdaıynda jumys istep jatyr. Dástúrli qaýip-qaterlermen qatar tsıfrlyq tehnologııalar men jasandy ıntellektiniń damýyna, kıberqaýipterdiń ósýine, ushqyshsyz áýe kemeleriniń taralýyna, sondaı-aq qarýly qaqtyǵystar men geosaıası turaqsyzdyqtyń saldaryna baılanysty jańa táýekelder týyndap otyr.
— Osy jaǵdaıda avıatsııalyq ınfraqurylymnyń asa mańyzdy nysandaryn qorǵaý, salanyń kıberıntsıdentterge mobıldiligin arttyrý, ushqyshsyz áýe kemelerin paıdalanýǵa baılanysty qaýip-qaterlerge qarsy is-qımyl jasaý, táýekelderdi baǵalaý tásilderin jetildirý jáne, onyń ishinde qaqtyǵystar jaǵdaıynda, aqparat almasýdyń tıimdiligin qamtamasyz etý erekshe mańyzǵa ıe.
IKAO-nyń 2026 jylǵy Avıatsııalyq qaýipsizdik aptalyǵy aıasynda is-sharaǵa qatysýshylar táýekelderdi basqarýdyń zamanaýı tásilderin, ınnovatsııalar men jańa tehnologııalardy engizý máselelerin, kadrlyq áleýetti damytý jáne avıatsııalyq qaýipsizdik júıelerin nyǵaıtý baǵyttaryn talqylaıdy. Azamattyq avıatsııa qyzmetiniń qaqtyǵystar jaǵdaıyndaǵy táýekelderin baǵalaýdyń praktıkalyq tásilderin jetildirýge jáne aqparat almasýdy damytýǵa erekshe nazar aýdarylady, — delingen habarlamada.
Talqylaýlar IKAO-nyń Avıatsııalyq qaýipsizdikti qamtamasyz etýdiń jahandyq jospary (GASeP) jáne IKAO-nyń turaqty monıtorıng júrgiziletin Avıatsııalyq qaýipsizdik aýdıtiniń ámbebap baǵdarlamasy (USAP-CMA) sııaqty negizgi jahandyq bastamalaryn iske asyrý aıasynda ótedi.
IKAO-nyń 2026 jylǵy Avıatsııalyq qaýipsizdik aptalyǵy 2027 jyly ótetin Avıatsııalyq qaýipsizdik jónindegi joǵary deńgeıdegi úshinshi konferentsııaǵa (HLCAS/3) halyqaralyq avıatsııa qaýymdastyǵynyń daıyndyǵynyń mańyzdy kezeńine aınalady. Astanada ótetin is-shara jahandyq avıatsııalyq qaýipsizdik júıesin odan ári damytý úshin mańyzdy basymdyqtar men tásilderdi talqylaýǵa múmkindik beredi.
Aıta ketelik elde avıatsııalyq oqıǵalardy tergeý júıesi jetildiriledi.
