Astana ІІD: Lombard esigin ishinen qaraqshynyń ózi jaýyp alǵan
ASTANA. QazAqparat - Astana polıtseıleri keshe Kenesary kóshesinde M-Lombardqa jasalǵan qaraqshylyq shabýylǵa qatysty birqatar málimettermen bólisti.
«14 tamyzda shamamen 08:30 saǵatta bilgisiz adam Kenesary kóshesinde ornalasqan «M-Lombard» ǵımaratynyń ishine basa-kóktep kirgen. Qarý kezenip, zergerlik buıymdardy tartyp alǵysy kelgen, onyń ústine esikti ishinen jaýyp alyp, 33 jáne 39 jastaǵy lombardtyń eki qyzmetkerin kepilde ustaǵan. Júrgizilgen kelissózder barysynda bir qyzmetker bosatyldy. Ekinshi qyzmetkerdi polıtseıler syrtqy esikti buzý arqyly qutqaryp alyp shyqty», - dep atap ótti Astana ІІD baspasóz qyzmeti.
Arnaıy operatsııa barysynda eshkim jaraqattanǵan joq.
Ustalǵan 42 jastaǵy jergilikti turǵyn Astana qalasy ІІD ýaqytsha ustaý ızolıatoryna qamaldy. Qaraqshylyq jáne adamdardy kepilge alý baptary boıynsha tergeý bastaldy. Operatsııa barysynda qylmyskerden pnevmatıkalyq qarý tárkilendi. Qazirgi ýaqytta qarý krımınaldyq zertteýge jiberildi. Tıisti saraptama jasalýda.
