Astana ІІD kólik basqarǵan bala jaıly vıdeoǵa qatysty tekserý júrgizip jatyr
ASTANA. QazAqparat - Astana polıtseıleri áleýmettik jelilerde júrgizýshiniń aldynda bala otyrǵany kórsetilgen vıdeo jarııalanǵannan keıin tekserý jumystaryn júrgize bastady, dep habarlaıdy «QazAqparat» HAA tilshisi.
Jol júrý erejesin buzý áreketi aıqyn kórsetilgen vıdeony «Ortaq jol» jol qozǵalysy qaýipsizdigi qaýymdastyǵynyń basshysy Ársen Shakýov jarııalady.
«Bul vıdeojazba bizdiń +7700 7172 102 whatsapp nomerimizge kelip tústi. Jibergen adam ondaǵy «kamrıdiń» joldy kesip, bir joldan ekinshi jolǵa ótip kele jatqandyqtan, mas dep oıladyq, alaıda kólikti eshteńeni túsinbeıtin kishkentaı bala basqaryp otyrdy dep túsindiredi. Ata-anasynyń nemese aldyna otyrǵyzǵan adamnyń balaǵa sonshalyqty nemquraıly qaraǵandyǵy ashýlandyrdy», - dep jazdy «Ortaq joldyń» Feısbýktegi paraqshasynda Ársen Shakýov.
Vıdeo astyna QR ІІM ákimshilik polıtsııa komıtetiniń baspasóz hatshysy Irına Lýkıanına «Astana ІІD atalǵan derek boıynsha tekserý jumystaryn júrgizip jatyr» dep pikir qaldyrdy.
