Astana ІІD qoǵamdyq kólikterdiń bárine beınebaqylaý kameralaryn ornatýdy usyndy
ASTANA. QazAqparat - Astana qalasynyń Іshki ister departamenti jol ústindegi qaýipti seıiltý úshin elordadaǵy qoǵamdyq kólikterdiń barlyǵyna beınebaqylaý kameralaryn ornatýdy usyndy, dep habarlaıdy «QazAqparat» HAA.
Astana qalasynyń ІІD bastyǵynyń orynbasary Sanjar Ádilovtiń aıtýynsha, jyl saıyn elimizdiń bas qalasynda halyq sany kóbeıip keledi. Keıbir otbasylarda ekiden nemese úshten kólik bar. Sondyqtan, jol apaty áleýmettik ótkir máselelerdiń biri bolyp tur. Búgingi tańda jol apatynyń sany kóbeıip, jol ústindegi ólim jaǵdaıynyń artqany baıqalǵan. Jyl basynan beri elordada jol-kólik oqıǵasy saldarynan 36 adam kóz jumǵan.
Astana qalasy ІІD anyqtaý basqarmasy jol-kólik oqıǵalaryn tergeý bóliminiń bastyǵy podpolkovnık Nurlan Muqanov saraptama jumystary kóp jaǵdaıda jol-kólik oqıǵasyna júrgizýshilerdiń olaqtyǵy sebep bolatynyn aıtady. Aǵymdaǵy jyldyń qańtar aıynan beri qalada 329 jol-kólik oqıǵasy tirkelgen. Jaıaý júrginshilerdi qaǵyp ketý jaǵdaıy kóptep ushyrasýda. Qoǵamdyq kólikterde de jolaýshylardyń kirýi nemese shyǵýy kezinde oryn alǵan oqys oqıǵalar bar.
1 qańtardan beri QK ózgeris engizilip, mas kúıde kólik júrgizgen adamdarǵa jaza qataıa túskeni belgili. Nurlan Muqanov 10 tamyzda «Lada» avtokóliginiń júrgizýshisi mas kúıde Qabanbaı batyr kóshesinde kóligimen kele jatyp, eki adamdy qaǵyp ketkenin jetkizdi. Osynyń saldarynan joldyń ruqsat etilmegen jerinen ótpek bolǵan eki adam oqıǵa ornynda qaza tapqan. Júrgizýshi qazir qamaýda. Sonymen qatar, 11 sáýirde «Hıýndaı» júrgizýshisi kóligimen «Máńgilik el» kóshesinde ruqsat etilmegen jerden mas kúıde ótpek bolǵan adamdy qaǵyp ketken. Kólik qaqqan adam ajal qushty. Alaıda júrgizýshiniń isin zertteı kele oǵan qatysty qylmystyq istiń quramy bolmaǵandyqtan, qylmystyq is toqtatylǵan.
«Oqys jaǵdaılardy saralaı kele qaıǵyly oqıǵalarǵa kóp jaǵdaıda jaıaý júrginshiler tap bolyp jatatynyn kórip otyrmyz. Osy sebepti, Astanadaǵy qoǵamdyq kólikterdiń barlyǵyna beınebaqylaý kamerasyn ornatýdy usynamyz. Sondaı-aq, kóshelerdiń shetine qorshaýlardy ornatyp tastaýdyń da mańyzy zor. Sońǵy tájirıbeni Almatyda qoldanyp kórgende buǵan qatysty qıyn jaǵdaılardyń azaıǵany baıqaldy. Sondyqtan, atalǵan eki usynysty keńirek talqylap, júzege asyrýdy usynamyn», - deıdi Nurlan Muqanov.
