Astana ІІD 216 adamdy jumysqa shaqyrady
ASTANA. QazAqparat - Astana qalasy ІІD Jergilikti polıtsııa qyzmetiniń bastyǵy polıtsııa polkovnıgi Baqytjan Malybaev elordanyń jol-patrýldik qyzmetinde 216 bos orynnyń bar ekendigin málim etti, dep habarlaıdy «QazAqparat» HAA tilshisi.
«Qazirgi tańda Astanadaǵy jol-patrýldik qyzmette 216 bos oryn bar. Osy aqparatty jarııalaǵymyz keledi. Eger nıet bildirýshi barlyq biliktilik talaptaryna saı keletin bolsa, ıaǵnı jumysqa turýshynyń jasy 35 jasqa deıin bolsa jumysqa alynady. Astana qalasynyń ǵana emes, ózge de óńirlerde turatyn jastardy alýǵa ázirmiz», - deıdi Baqytjan Malybaev.
Onyń aıtýynsha, JPQ-ǵa jumysqa turý úshin nıet bildirýshi Memlekettik qyzmet isteri jáne sybaılas jemqorlyqqa qarsy is-qımyl agenttigindegi mindetti emtıhannan ótýi tıis.
«Emtıhannan ótkennen keıin nıet bildirýshi áskerı-dárigerlik komıssııadan ótýi kerek. Eger barlyq talaptarǵa saı bolsa, biz ony belgili qyzmetterdiń tekserisinen keıin jumysqa alamyz», - deıdi ol.
