«Astana ıdeıasy qazaqqa ne berdi?» - respýblıkalyq basylymdarǵa sholý

***
Qazaqstan Magnıtkasyna 50 jyl toldy. Memleket basshysy Nursultan Nazarbaev №4 domna peshinde merekelik shoıyn alynýyna qatysty. Osyǵan oraı «Egemen Qazaqstan» gazetiniń búgingi nómirinde «El qýatynyń tiregi» degen taqyryppen kólemdi maqala jarııalandy. basylymnyń baıandaýynsha, Elbasy budan soń qalalyq Mádenıet saraıyna kelip, qazaqstandyq tuńǵysh shoıyn alynýynyń 50 jyldyǵyna arnalǵan saltanatty jınalysqa qatysýshylardy quttyqtaǵan. Sondaı-aq Memleket basshysy birqatar azamattardy eńbektegi eren tabystary úshin memleketimizdiń joǵary nagradalarymen marapattaǵan.

«Keshe Parlament Senatynyń Tóraǵasy Qasym-Jomart Toqaev Ázirbaıjannyń Qazaqstandaǵy elshisi Lıatıf Seıfeddın ogly Gandılovty onyń bizdiń eldegi dıplomatııalyq mıssııasynyń aıaqtalýyna baılanysty qabyldady», dep jazady «Egemen Qazaqstan» gazeti. Kezdesý barysynda tóraǵa Qazaqstan men Ázirbaıjan arasynda dostyq qatynastardy nyǵaıtýda qomaqty úlesine oraı L.Gandılovqa alǵys aıtyp, dıplomatqa alǵys hat tabys etti. L.Gandılov óz kezeginde óziniń Elshilik qyzmetine qoldaý bildirgeni úshin Qazaqstan basshylyǵyna rızashylyǵyn bildirdi.

Keshe Astanada Memlekettik hatshy - Syrtqy ister mınıstri Qanat Saýdabaev qazaqstandyq dıplomattardy kásibı merekelerimen quttyqtady. «Egemen Qazaqstan» gazetiniń atap ótýinshe, qazirgi tańda Qazaqstan álemniń 120-dan astam elimen joǵary dıplomatııalyq qarym-qatynas ornatqan. Elimizdiń syrtqy saıasat mekemeleri 60-qa tarta memlekette oryn tepken. Al Qazaqstanda álemniń 60 eliniń elshiligi men 20 halyqaralyq uıymy eńbek etýde.

***

«Elordadaǵy Ulttyq akademııalyq kitaphanada Qazaqstan halqy assambleıasynyń janyndaǵy Ǵylymı-saraptamalyq keńes Astana kúni merekesine jáne Qazaqstan halqy assambleıasynyń 15 jyldyǵyna oraı jaryq kórgen «Nursultan Nazarbaev: beıbitshilik jáne qoǵamdyq kelisim ıdeıasy» jáne «Qazaqstan halqy assambleıasy: tarıhı ocherk» kitaptarynyń tusaýyn kesti», dep jazady «Aıqyn» gazeti. Atalǵan jańa basylymdar týrasynda gazettiń senbilik nómirinen egjeı-tegjeıli oqı alasyzdar.

«Aıqyn» gazetiniń senbilik sanynda QR Parlamenti Májilisiniń depýtaty Irak Elekeevtiń «Kórkem. Kóregen. Kósem» degen maqalasy jarııalandy. «Búgingi tańda Tuńǵysh Prezıdentimizdiń basshylyǵymen Qazaqstan Respýblıkasy tolyqqandy memleket bolyp qalyptasty jáne kóptegen úlgili-irgeli elderdiń qataryna shyqty. Halyqaralyq dárejede izgilikti, zaıyrly el retinde, ozyq mádenıetke, órkenıetke qabiletti memleket, ult bolyp qabyldanyp otyrmyz. Táýbá! Osy jarqyn jetistikterimizdiń bári álem tanyǵan Elbasymyzdyń arqasy!», dep jazady maqala avtory.

***

«Alash aınasy» gazetiniń senbilik nómiri tolyǵymen elordamyz Astana qalasynyń merekesine arnalǵan. Sondaı maqalalardyń biri «Astana ıdeıasy qazaqqa ne berdi?» degen taqyryppen basyldy. Astana - talaı zertteýshilerdiń yqylasyn týǵyzǵan san qyrly fenomen. Qat-qabat astary mol Astana fenomeniniń ózegi tarıhy tereń qazaq memlekettiginiń nyshany, qazaqtyń tól bolmysy, qazaq ultynyń jasampazdyq kelbeti bolýy tıis jáne solaı bolyp ta jatyr. Osy oraıda basylym sol ǵajap fenomenniń bir parasy retinde «Astana ıdeıasy qazaqqa ne berdi?» degen zańdy saýalǵa shama-sharqynsha jaýap berýge tyrysqan. «Buǵan deıin astyqty óńir mártebesi bar Astana jobasy sońǵy 12 jyldyń bederinde jalpyulttyq ıdeologııanyń quramdas bóligine aınaldy. Astana ıdeıasynyń máni - otarsyzdanýǵa jasalǵan betburys, qazaqtanýǵa baǵyttalǵan uly kósh edi. Osynyń arqasynda memleketquraýshy ultqa keń múmkindikter týyp, orysy kóp Arqada ulttyq ıdeologııa ústemdik alyp, san jyldar siresip qalǵan quldyq sananyń kóbesi sógile bastady. Sondyqtan Astana elorda bolǵaly Táýelsiz memleketimizdiń tarıhynda órleý bastaldy deýge tolyq negiz bar», dep jazady basylym.

Al kelesi «Astana - qaýipsizdik kepili» degen maqala tarıhshy-ǵalym Talas Omarbekovtiń áńgimesi negizinde órbigen. Basylymnyń atap ótýinshe, Astanany jasaý, ornyqtyrý táýelsiz elderdiń bárine tán. Dúnıe júziniń búkil elderi «memleketti nyǵaıtýdyń negizi - astanany nyǵaıtý» dep biledi. Astanasy myqty bolmaǵan el - álsiz el. Óıtkeni astana - memlekettiń sımvoly, táýelsizdiktiń sımvoly. Sondyqtan da astanany nyǵaıtý máselesi - úlken saıasattyń quraly, ıaǵnı memlekettiń abyroıy, ar-ujdany. Munymen birge, «memlekettiń bolashaqtaǵy kelbeti, ondaǵy qalalar qandaı bolýy tıis, eldegi úlken qalalar kimge qarap úlgi alýy kerek» degen máselede de astana temirqazyq bolýy shart.

***

«Keshe ІІІ Astana ekonomıkalyq forýmy aıaqtaldy», dep jazady «Astana aqshamy» gazeti. Basylymnyń atap ótýinshe, alqaly jıynnyń ashylýyna qatysqan Elbasy atalǵan sharaǵa Nobel syılyǵy laýreattarynyń qatysýy álemge belgili kóshbasshylar, saıasatkerler, halyqaralyq uıymdardyń jetekshilerimen pikirtalastarǵa jáne ózekti máselelerdiń talqylaný tájirıbesine ekpin beretinin, Astana forýmynyń álemdik daǵdarystan keıingi kezeńdegi damý joldary men teńdikti eńserý týraly tıimdi usynystar aıtylatyn alańnyń biri retindegi bedeliniń ósýiniń jarqyn mysaly bolyp tabylatynyn atap ótken.

Qala kúni merekesi qarsańynda Astanadaǵy Ulttyq ǵylymı medıtsınalyq ortalyqta diń jasýshalarynyń zerthanasy saltanatty túrde ashyldy. «Astana aqshamy» gazetiniń jazýynsha, shara barysynda Densaýlyq saqtaý mınıstri Jaqsylyq Dosqalıev bir diń jasýshasynyń quny 160 myń teńge turatyny, al baýyr ragin emdeý úshin ondaı 10 jasýsha kerektigin aıta kele, bul rette qazaqstandyq naýqastardyń arnaıy kvotamen tegin emdele alatynyn, al shetel azamattaryna onyń aqyly júrgiziletindigin jetkizgen.

***

«Qazaqstan Respýblıkasynyń Premer-Mınıstri Kárim Másimov ІІІ Astana ekonomıkalyq forýmynyń qatysýshylarymen birqatar kezdesýler ótkizdi», dep jazady «Kazahstanskaıa pravda» gazeti QR Úkimeti basshysynyń baspasóz qyzmetine silteme jasap.

Syrtqy saýda isteri jónindegi Memlekettik hatshy Ann-Marı Idrak bastaǵan Frantsýz Respýblıkasynyń delegatsııamen kezdesý barysynda álemdik ekonomıkadaǵy aǵymdaǵy jaǵdaı jóninde pikir alysyldy, sondaı-aq qazaqstan-frantsýz ındýstrııalyq yntymaqtastyǵy máseleleri talqylanǵan.