Astana Hub tabysy 1,2 trln teńgege jetti: JI bilim men ǵylymǵa enip jatyr

ASTANA. KAZINFORM – Prezıdenttiń byltyrǵy Joldaýyn jáne ózge de tapsyrmalaryn júzege asyrý aıasynda elimizde jasandy ıntellekt belsendi damyp, jańa bilim berý bastamalary engizilýde.

Vedomstvonyń derekterine sáıkes, IT-salasy turaqty ósim kórsetip otyr. Qazaqstandaǵy IT-kompanııalardyń sany 18 myńnan asty, sońǵy úsh jyldaǵy ósim 16 paıyzdy qurady. 1700-den astam qatysýshyny biriktiretin Astana Hub halyqaralyq tehnoparki salanyń mańyzdy draıverine aınaldy. Rezıdentterdiń jıyntyq túsimi 1,2 trln teńgege jetip, eksporttyq tabys 140 mlrd teńgeden asty.

Innovatsııalyq ekojúıeniń negizgi elementteri – óńirlik IT-habtar. Qazir olardyń sany elimizde 19-ǵa jetti. Budan bólek Saýd Arabııasy, AQSh, Ulybrıtanııa, Dýbaı jáne Qytaıda sheteldik alańdar ashyldy.

MIT (Massachýsets tehnologııalyq ınstıtýty) ýnıversıtetimen birlesip, mektep baǵdarlamalaryna jasandy ıntellekt pánin engizý bastaldy. Aldymen bul bastama 1-4 synyptarǵa engizilip, keıinnen joǵarǵy synyptarǵa deıin jalǵasady.

Mamyr aıynda jasandy ıntellekt boıynsha alǵashqy respýblıkalyq olımpıada – AI Olymp ótti. Ulttyq qurama Beıjińde ótken halyqaralyq olımpıadada 3 altyn, 1 kúmis jáne 3 qola medal ıelendi. Qazaqstan Polsha, Úndistan jáne Vetnammen birge altyn medaldar sany boıynsha tórtinshi oryndy bólisti.

Sonymen qatar memlekettik qyzmetshilerdi jasandy ıntellekt quraldarymen jumys isteýge úıretetin AI Qyzmet baǵdarlamasy iske qosyldy. Ol memlekettik basqarý úderisterine tsıfrlyq sheshimderdi engizý arqyly qyzmettiń tıimdiligin arttyrýǵa baǵyttalǵan.

«2024-25 jyldar jasandy ıntellekt salasyndaǵy mańyzdy bastamalardyń ýaqyty boldy. 2029 jylǵa deıingi tujyrymdama bekitildi, JI jáne tsıfrlyq transformatsııany damytý strategııasy, sondaı-aq jasandy ıntellekt jónindegi zań jobasy ázirlenýde», – dep atap ótti tsıfrlyq damý, ınnovatsııa jáne aeroǵarysh ónerkásibi mınıstri Jaslan Mádıev.

Onyń aıtýynsha, qazirgi ýaqytta mamandardy daıarlaý jáne ǵylymı zertteýler júrgizý alańy bolatyn Alem.AI halyqaralyq jasandy ıntellekt ortalyǵyn iske qosý jumystary júrip jatyr.

Aıta keteıik, bilim berý salasynda jasandy ıntellektini qoldanýdyń etıkalyq standarty bekitildi.