Astana Hub-ta tirkelgen kompanııalardyń tóleıtin jarna somasy ózgere me
ASTANA. KAZINFORM – Astana Hub qurlymynda startaptarǵa kómektesý múmkindigi artady. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev aıtty.
Buǵan deıin jańa zań jobasy aıasynda Astana Hub-qa tirkelgen kompanııalar múshelik jarna tóleıtinin jazǵan edik.
Mınıstrdiń sózinshe, qazir Astana Hub-qa múshe zańdy tulǵalar ortalyqqa tirkelip, jumys istegeni úshin kirisiniń 1 paıyzyn ǵana alym retinde tólep otyr. Endi bul alymnyń ornyna múshelik jarna tetigi engiziledi.
Osy oraıda Parlament Májilisinde tilshiler «alymdar men tólemderdi» ne sebepti «múshelik jarnalarǵa» aýystyrylyp jatqanyn surady.
Óz kezeginde J.Mádıev zańdy tulǵalardyń ortalyqqa tóleıtin jarnasy da 1 paıyz deńgeıinde saqtalatynyn naqtylady.
- Somasy men paıyzy ózgermeıdi, ıaǵnı 1 paıyz deńgeıinde qalady. Bul turǵyda tek uǵymyn ózgertip jatyrmyz. Alymnyń ornyna «múshelik jarna» uǵymyn engizý arqyly salyq salasyndaǵy ońtaılandyrý jaǵynan paıda bolady. Sonymen qatar, startaptarǵa kómektesý múmkindigi artady, - dedi mınıstr.
Budan buryn habarlanǵandaı, búgin Májilis Astana Hub pen Innovatsııalyq tehnologııalar parkin biriktirý týraly zań jobasyn birinshi oqylymda maquldady.