Astana Hub-ta Koreı-Qazaqstandyq IT-ortalyǵy ashylady
NUR-SULTAN. QazAqparat - 21 qarashada Ońtústik Koreıanyń Seýl qalasynda «Zerde» Holdıngi» AQ jáne Koreıa Respýblıkasynyń Ulttyq aqparattyq qoǵam agenttigi (NIA) Aqparattyq tehnologııalar salasyndaǵy yntymaqtastyq ortalyǵyn qurý jáne jumys isteý úshin yntymaqtastyq týraly memorandýmǵa qol qoıdy.
Taraptardyń kezdesýi NIA keńsesinde ótti, onda «Zerde» holdıngi» AQ basqarma tóraǵasy Erlan Dýrmaǵambetov pen NIA prezıdenti Iong-Sık Mýn kelisimge qol qoıyp, ortalyqtyń tujyrymdamasyn talqylady.
Memorandýmǵa sáıkes aqparattyq tehnologııalar salasyndaǵy Koreı-qazaqstandyq yntymaqtastyq ortalyǵy (budan ári - ATYO) «Astana Hub» IT-startaptardyń halyqaralyq tehnoparki bazasynda jumys isteıtin bolady.
ATYO-nyń negizgi maqsaty eki eldiń ekonomıkalyq jáne áleýmettik damýyna yqpal ete otyryp, AKT salasynda tájirıbe almasý jolymen Ońtústik Koreıa men Qazaqstanda aqparattyq qoǵam qurýǵa járdemdesý bolyp tabylady.
Ortalyq eki eldiń IT-mamandary úshin tájirıbe jáne bilim almasý, birlesken jobalardy damytý, sondaı-aq jasandy ıntellekt, úlken derekter, ashyq derekter, Internet zattary, smart sıtı, 5G jáne t. b. qosa alǵanda, jańa tehnologııalar boıynsha zertteýler júrgizý alańyna aınalady. Budan basqa, Ortalyqty qurý áreketi AKT, tehnologııalar almasý jáne ózara ınvestıtsııalar salasyndaǵy saıasatty jandandyrý jolymen memlekettik organdar, AT-kompanııalar, Qazaqstan men Ońtústik Koreıanyń ǵylymı toptary arasyndaǵy ózara is-qımyldy keńeıtýge múmkindik beredi.
Esterińizge sala keteıik, aǵymdaǵy jyldyń tamyz aıynda Qazaqstan astanasynda sandyq damý, ınnovatsııa jáne aeroǵarysh ónerkásibi Vıtse-mınıstri jáne Koreıa Respýblıkasynyń Ulttyq aqparattyq qoǵam agenttiginiń Vıtse-prezıdenti qatysýymen aqparattyq-kommýnıkatsııalyq tehnologııalar salasyndaǵy yntymaqtastyq jónindegi qazaqstan-koreı semınary ótti. Іs-shara barysynda taraptar yntymaqtastyqtyń basym baǵyttaryn, sonyń ishinde bolashaq ATYO-n qurýdy talqylady.
