Astana Hub startaptary 6 jyldyń ishinde $665,5 mıllıon ınvestıtsııa tartqan
ASTANA. KAZINFORM – Ortalyq Azııadaǵy eń iri halyqaralyq tehnopark Astana Hub alty jyl boıy óńirde IT-ındýstrııa men ınnovatsııalardy damytýǵa zor serpin berip keledi. Sondaı-aq tehnologııalyq bıznes úshin ekojúıe qurýda eleýli jetistikterge qol jetkizdi. Bul týraly kompanııanyń baspasóz qyzmeti málim etti.
2018 jyldan beri tehnopark qatysýshylarynyń sany 185-ten 1 571 kompanııaǵa deıin ósti, sonyń ishinde 430-dan astamy sheteldik qatysýmen. Osy ýaqyt ishinde tehnopark qatysýshylary 28 myńnan astam jumys ornyn qamtamasyz etti. Astana Hub startaptarǵa salyq jeńildikterin, arnaıy eńbek jáne vızalyq rejımin, sondaı-aq keńse jáne baspana usynyp, Qazaqstandaǵy IT-qoǵamdastyqtyń belsendi damýyna yqpal etedi. Tehnopark ınfraqurylym bazasynda Playrix, TikTok, inDrive, EPAM, Glovo, DAMUMED, Presight.ai jáne basqa da iri halyqaralyq kompanııalardyń keńseleri ornalasqan.
Tabys pen eksporttyń ósýi: Tehnopark iske qosylǵannan beri onyń rezıdentteriniń jalpy tabysy $1,9 mıllıardty qurady: 2019 jyly $35 mıllıon bolsa, 2023 jyly $875 mıllıonǵa jetti, al 2024 jyly bul kórsetkish $1,147 mıllıondy quraıdy degen boljam bar. Astana Hub qatysýshylarynyń qyzmetter eksporty da qarqyndy ósýde: sońǵy tórt jylda tabys $630 mıllıondy qurady, al 2024 jyldyń nátıjesin eskersek, qatysýshylardyń bes jylǵa shaqqandaǵy ortaq IT eksporty $1 mıllıardtan asýy tıis.
Investıtsııa tartý: Alty jyl ishinde Astana Hub startaptary $665,5 mıllıon kóleminde ınvestıtsııa tartyp, Qazaqstannyń IT-ekojúıesin aıtarlyqtaı nyǵaıtýǵa jáne jobalardy halyqaralyq deńgeıge shyǵarýǵa múmkindik berdi. Halyqaralyq naryqqa sátti shyǵyp, jyldam damyp jatqan perspektıvti startaptar arasynda CerebraAI, CodiPlay, Parqour, ApartX, Kwaka, Biometric, Beksar, Alaqan, Zypl.ai, ZebraEye, Arlan Biotech jáne basqalary bar.
Startaptardy qoldaý boıynsha negizgi baǵdarlamalar: Astana Hub startaptarǵa Scalerator, Techpreneurs, Startup Garage jáne Global Outsourcer baǵdarlamalary arqyly damýdyń barlyq kezeńderinde qoldaý kórsetedi. Negizgi akseleratorlar qatarynda Silkway Accelerator bar, ol Google for Startups-pen birlesip ázirlengen jáne startaptarǵa halyqaralyq naryqqa shyǵýǵa kómektesedi. Ortalyq Eýrazııa startaptarynan túsken 1300-den astam ótinimniń ishinen úzdik shyqqan 62 joba baǵdarlamany sátti aıaqtady. Olardyń jalpy kapıtalızatsııasy $430 mıllıonǵa jetip, BAÁ, Túrkııa jáne AQSh naryqtarynan $27 mıllıon ınvestıtsııa tartty. Sondaı-aq Draper University jáne Dúnıejúzilik banktiń qoldaýymen júzege asyrylyp jatqan Hero Training baǵdarlamasy aıasynda 37 startap Kremnıı alqabynda aýqymdy akseleratsııadan ótýge múmkindik aldy. Sonyń ishinde CITIX jobasyna álemge tanymal venchýrlyq ınvestor Tım Dreıper $1 mıllıon ınvestıtsııa quıǵan bolatyn.
Kadrlyq áleýetti damytý: IT-bilim berýdegi jetekshi bastamaǵa aınalǵan Tech Orda baǵdarlamasy iske qosylǵan sátten bastap 9 myńnan astam qazaqstandyq IT-mamandyǵy boıynsha tegin bilim alý múmkindigine ıe boldy, al 2025 jylǵa qaraı 20 myń adamdy oqytý josparlanǵan. Bul joba aıasynda ár stýdentke memleketten 600 000 teńgege deıin vaýcher bólinedi. Sondaı-aq Astana Hub tehnoparki Alem School, No Code/Low Code School, Startup School, Beta Career, Freelance School, IT-Aiel jáne basqa da bilim berý baǵdarlamalaryn usynady. 2024 jyldyń shilde aıynda pılottyq rejımde eldiń 180 mektebi úshin baǵdarlamalaýdyń negizgi bilimderin oqytýǵa arnalǵan onlaın-platforma iske qosyldy, onda 120 trener 10-11 synyptyń 19 myńnan astam oqýshysyn No Code, Low Code jáne Startup Academy baǵdarlamalary boıynsha oqytady.
Óńirlik damý: Astana Hub óńirlik IT-habtardy belsendi damytyp, Qazaqstanda jergilikti IT-qoǵamdastyqtardy qalyptastyrýǵa jáne turaqty IT-talanttar legin qamtamasyz etýge yqpal etedi. Eldiń 17 óńirinde IT-habtar jumys istep tur, al jyldyń sońyna qaraı on segizinshisi ashylady. Bul ortalyqtar ulttyq tehnologııalyq ekojúıeniń mańyzdy bóligi retinde tsıfrlyq quzyretterdi jáne jergilikti qaýymdastyqtardy damytady. 2023 jyldan bastap óńirlik habtarda 1 600-den astam is-shara, sonyń ishinde 7 halyqaralyq forým ótkizildi, 48 myńnan astam adam qatysty, 440 startap quryldy, bul IT-bilim berýdi damytýǵa jáne jańa jumys oryndaryn qurýǵa yqpal etedi.
Jasandy ıntellekt bastamalary: Jasandy ıntellektti (JI) damytý — Astana Hub-tyń basym baǵyttarynyń biri, sondyqtan Qazaqstanda JI-dy nasıhattaý men damytýǵa baǵyttalǵan aýqymdy AI Movement baǵdarlamasy iske qosyldy. Baǵdarlama aıasynda Tomorrow School eldegi alǵashqy jasandy ıntellekt mektebi ashyldy, sondaı-aq Decentrathon atty eń iri hakaton, AI People Bootcamp, «JI negizderi: ChatGPT» onlaın-kýrsy jáne aımaqtardaǵy Roadshow sııaqty bastamalar júzege asyryldy. Bul jobalar talantty mamandardy tartyp, JI salasyndaǵy bilim alýdy damytyp, 2025 jyly ashylatyn Ulttyq jasandy ıntellekt ortalyǵynyń negizin qalaýǵa jaǵdaı jasaıdy.
Aldaǵy maqsat-mindetter: Astana Hub startaptardy qoldaý jáne Qazaqstan ekonomıkasyn tsıfrlandyrý úshin ekojúıeni belsendi damytýdy jalǵastyra otyryp, aýqymdy maqsattarǵa jetýdi kózdeıdi: 2026 jylǵa qaraı IT-qyzmetterdiń jyldyq eksportyn $1 mıllıardqa jetkizý jáne 2027 jylǵa qaraı qazaqstandyq «ıýnıkorndy» qalyptastyrý.
