Astana Hub segiz jylda 2 700 kompanııany biriktirdi
ASTANA. KAZINFORM — Astana Hub halyqaralyq ınnovatsııalyq klasteri 8 jyl ishinde quny 6,7 mlrd dollar bolatyn tehnologııalyq ekojúıe qurdy.
Astana Hub segiz jylda 2 700 kompanııany biriktirip, qazaqstandyq IT salasynyń damýyna úles qosty. 2019 jyldan beri ekojúıe qatysýshylarynyń jıyntyq tabysy 6,7 mlrd dollarǵa jetip, IT qyzmetteriniń eksporty 2,4 mlrd dollardy qurady. Al startaptar 2 mlrd dollardan astam ınvestıtsııa tartty.
Búginde Astana Hub quramynda sheteldik úlesi bar 560 kompanııany qosa alǵanda, 2 700 kásiporyn bar. Qazaqstannyń 20 óńirinde IT-habtar jumys isteıdi. Olar ashylǵaly beri 5 200-den astam is-shara ótkizilip, oǵan 80 myń adam qatysqan. Sonymen qatar 700 startap óz jobasyn tanystyrdy.
2026 jylǵy mańyzdy oqıǵalar
Bıyl Shymkentte Digital Qazaqstan forýmy, Astanada AI & Digital Bridge 2026 halyqaralyq forýmy jáne Qazaqstanda alǵash ret GITEX AI Kazakhstan kórmesi ótti. Sondaı-aq NVIDIA men OpenAI ókilderi qatysqan HackAlem AI hakatonyna 2 415 adam qatysyp, Gınness rekordy tirkeldi.
IT mamandaryn daıarlaý
Astana Hub jańa býyn IT mamandaryn daıarlaýǵa arnalǵan birneshe bilim berý baǵdarlamasyn júzege asyrady. TUMO Astana ortalyǵynda 2 430 jasóspirim tsıfrlyq jáne kreatıvti baǵyttardy meńgerip jatyr.
Tech Orda baǵdarlamasy aıasynda 11 410 maman daıarlandy. Túlekterdiń 90 paıyzy jumysqa ornalasqan. Tomorrow School mektebinde 481 stýdent bilim alýda. Eki jyl ishinde mektepke 24 myńnan astam ótinim túsip, onyń jelisi Qazaqstannyń 14 qalasyna deıin keńeıdi.
Al mashınalyq oqytý salasyndaǵy ML School Kazakhstan baǵdarlamasyna túsýge 822 ótinim túsip, 32 adam irikteldi. Buǵan qosa, onlaın-platformada derekterdi taldaý, Prompt Engineering jáne No Code/Low Code baǵyttary boıynsha kýrstar usynylady.
Startaptardy qoldaý jáne ınvestıtsııa tartý
Astana Hub startaptarǵa arnalǵan akseleratsııalyq baǵdarlamalardy da damytyp keledi. Silkway Accelerator 83 startapty qoldasa, Startup Garage 1 400-den astam jobaǵa kómektesti. AI’preneurs baǵdarlamasyn 125 adam aıaqtap, 51 startap joba ázirledi. Olardyń satylymy 618 myń dollardan asyp, tartqan ınvestıtsııasy 400 myń dollarǵa jetti.
Astana ákimdigimen birlesken Astana Innovations Accelerator baǵdarlamasyna 354 ótinim túsip, 17 joba qala mektepterinde, medıtsınalyq mekemelerde, kommýnaldyq kásiporyndarda, kólik salasy men TJD bólimshelerinde iske qosyldy.
Al Central Eurasian Market Entry baǵdarlamasyna 14 elden 132 ótinim túsip, 13 startap irikteldi. Baǵdarlama olardyń Ortalyq Azııa naryǵyna shyǵýyna kómektesedi.
Halyqaralyq baılanys jáne ınvestıtsııalar
Astana Hub Ventures qorynyń portfelinde 90-nan astam startap bar. 2026 jyly qor Higgsfield, Mirai Tech, Perceptis, PanDev Metrics, Luwo, Admyra, Resti jáne Scano jobalaryna ınvestıtsııa saldy.
Qazaqstandyq startaptardyń shetel naryǵyna shyǵýyna kómektesetin Hero Training, Alchemist Silkroad jáne Globalpreneurs baǵdarlamalary da jumys isteıdi. Sonymen qatar Astana Hub AQSh, BAÁ, Qytaı, Malaızııa jáne Ulybrıtanııada halyqaralyq ınnovatsııalyq habtar jelisin damytyp keledi.
Digital Nomad Residency jáne Digital Nomad Visa baǵdarlamalary arqyly sheteldik IT mamandardy Qazaqstanǵa tartý kózdelgen. Olar iske qosylǵaly beri 82 elden 2 200 ótinim túsken.
Segiz jyl ishinde Astana Hub startaptar men tehnologııalyq kompanııalardy qoldaıtyn iri ekojúıege aınaldy. Búginde onyń jumysy IT mamandaryn daıarlaýǵa, ınnovatsııalyq jobalardy damytýǵa, ınvestıtsııa tartýǵa jáne qazaqstandyq kompanııalardyń halyqaralyq naryqqa shyǵýyna baǵyttalǵan.
Osydan buryn Qazaqstanda Astana Hub qatysýshylary úshin taǵy bir mańyzdy qoldaý tetigi iske qosylǵanyn jazǵanbyz.
