Astana Hub maınıng fermalar arqyly zańsyz aktıvterdi jylystatýǵa jol berip otyr ma – zań jobasy

ASTANA. KAZINFORM – Májilis depýtaty Baqytjan Bazarbek Astana Hub, «Qazaqstan halqyna» qoǵamdyq qory, «Jasyl damý» aktsıonerlik qoǵamy sııaqty mekemelerdiń qarjylyq monıtorıng aıasynan tys qalyp bara jatqanyna narazylyq bildirdi.

- Qarjylyq monıtorıng sýbektileriniń tiziminde nege «Zańsyz aktıvterdi qaıtarý jónindegi» jaýapkershiligi shekteýli seriktestik joq? Astana Hub-ta kóp bylyq bolyp jatyr. Bul uıym nege qarjylyq monıtorıng sýbektisine kirmeıdi? «Qazaqstan halqyna» qoǵamdyq qory nege joq? Avtolombardtar, «Jasyl damý» aktsıonerlik qoǵamy, Biryńǵaı esep aıyrysý ortalyqtary (ERTs – red.) nege kirmeıdi? Qazir Ónerkásip jáne qurylys mınıstrligi búkil tólemderdiń qarjy aınalymyn biryńǵaı ortalyqtarǵa berip jatyr. Endaýment qorlar nege joq, - dep surady Baqytjan Bazarbek.

Agenttik basshysynyń orynbasary depýtat ataǵan uıymdardyń bir bóligi zań jobasy boıynsha monıtorıng aıasyna kirgenin atap ótti.

- Avtolombardtar, Astana Hub dep jatyrsyz. Olardyń bári biz usynyp otyrǵan zań jobasy boıynsha qarjylyq monıtorıng sýbektisine kirgen. FATF usynymynda aıtylǵan uıymdardyń bári zań jobasyn kirdi. Basqa atalǵan sýbektilerdi monıtorıng aıasyna kirgizý týraly usynystaryńyz bolsa, qarastyrýǵa daıynbyz.

Baqytjan Bazarbek Astana Hub zań jobasynda kirdi degen jaýapty teriske shyǵardy.

- Sizder zań jobasynda usynyp otyrǵan 20 sýbektiniń qatarynda Astana Hub joq. Al tsıfrlyq aktıvterdiń quramynda maınıng ortalyqtary da bar. Qazir barlyq zańsyz, qylmystyq jolmen tabylǵan aktıvterdiń kóbi maınıng ortalyqtar arqyly jylystatylyp jatyr. Astana Hub-tyń ishinde maınıngpen baılanysty mekemeler óte kóp. Sondyqtan qarastyrý ǵana az, men ataǵan mekemelerdi úzildi-kesildi monıtorıng aıasyna kirgizý kerek, - dedi depýtat.

Eske salsaq, Ulttyq bank tóraǵasynyń orynbasary Berik Sholpanqulov qazaqstandyqtar kóleńkeli aımaqtan 15 mlrd dollarǵa krıptovalıýta satyp alǵanyn málim etken bolatyn.