Astana Hub qatysýshylaryna jańa jeńildik: birqatar tehnologııalyq jabdyq QQS-syz ákelinedi
ASTANA. KAZINFORM – Qazaqstanda Astana Hub qatysýshylary úshin taǵy bir mańyzdy qoldaý tetigi iske qosyldy. Endi IT-kompanııalar shetelden ákeletin birqatar tehnologııalyq jabdyqtarǵa qosylǵan qun salyǵyn (QQS) tólemeıdi.
QR Premer-mınıstriniń orynbasary – Jasandy ıntellekt jáne tsıfrlyq damý mınıstri Astana Hub qatysýshylary úshin QQS-dan bosatylatyn taýarlardyń jańa tizimin bekitti. Tizimge aqparattyq tehnologııalar salasynda keńinen qoldanylatyn 41 túrli taýar engizilgen.
Olardyń qatarynda noýtbýkter, derekterdi óńdeý qurylǵylary, jad saqtaý júıeleri, mıkroprotsessorlar, dybystyq kartalar, proektorlar, radıonavıgatsııalyq jabdyqtar jáne jartylaı ótkizgishter óndirisinde qoldanylatyn arnaıy qurylǵylar t.b. ónimder bar.
QQS jeńildigin alý úshin kompanııa Astana Hub halyqaralyq tehnoparkiniń resmı qatysýshysy bolýy kerek. Sonymen qatar, kásiporynnyń jyldyq tabysynyń keminde 90%-y aqparattyq-kommýnıkatsııalyq tehnologııalar salasyndaǵy qyzmetten túsýi qajet.
Budan bólek, ákelinetin jabdyqtar arnaıy bekitilgen tizimde bolýy jáne kompanııanyń negizgi IT qyzmetinde paıdalanylýy tıis. Import rásimi de qoldanystaǵy keden zańnamasyna sáıkes júrgizilýi qajet. Demek, EAEO Keden kodeksi nemese «Qazaqstan Respýblıkasyndaǵy Kedendik retteý týraly» QR Kodeksi qoldanylýy kerek.
Buıryq 19 maýsymnan bastap kúshine enedi.
Aıta keteıik, buǵan deıin tsıfrlandyrý men JI Qazaqstannyń jańa damý kezeńine jol ashatyny jónindegi Prezıdent málimdemesin jarııalaǵanbyz.
