Astana Hub basshysy bıznes bastap, ınvestıtsııa tartý joldaryn aıtty

ALMATY. QazAqparat – Astana Hub halyqaralyq tehnoparkiniń bas dırektory Djozef Tsıgler Qazaqstanda bıznes bastaý jáne ınvestıtsııa tartý joldaryn aıtty, dep habarlaıdy QazAqparat tilshisi.

Djozef Tsıgler Almatyda jas kásipkerlermen, stýdenttermen kezdesti.

«Kremnıı alqabynda (AQSh-taǵy Kremnıı alqaby – joǵarytehnologııaly, ǵylymı startaptardy qurý jáne alǵa jyljytý boıynsha biregeı tájirıbeler jınaqtalǵan oryn) tabysty startaptarmen 40-tan asqandar aınalysady. Al Qazaqstanda qandaı jańalyqty bolsa da 30-ǵa tolmaǵan jastar qolǵa alyp júr», - deıdi ol.

Onyń aıtýynsha, startap jasamaq bolǵan adam naryq pen tıisti salany jete zertteýi qajet.

«Bizdiń komandadan shyqqan jigitter jap-jaqsy bıznesin bastap, ınvestıtsııa tartyp júr. Bizge jańa ıdeıalar men startaptar kerek. Bizdiń jigitter álemniń ár qalasyna baryp, kórmelerde ózderiniń startaptaryn tanystyrýda. Sol arqyly halyqaralyq ınvestor izdeıdi», - dedi spıker.

Qazir Astana Hub komandasy Startup Sapary baǵdarlamasy aıasynda ІT salasyndaǵy jas kásipkerler úshin «Startap mektebi» tegin kýrsyn ótkizip jatyr.

Olar Petropavl, Atyraý, Qyzylorda, Túrkistan, Oral, Qaraǵandy, Kókshetaý, Taraz, Óskemen, Pavlodar, Taldyqorǵan jáne Shymkent qalalarynda boldy.

Astana Hub tehnoparki startap-jobalardy daıyndaýmen jáne damytýmen aınalysady. Tehnoparkte startap mektebi, ınkýbatsııa jáne akseleratsııa baǵdarlamalary sııaqty tegin kýrstar bar. Aldaǵy ýaqytta Astana Hub óńirlerdegi tehnoparktermen birlesken jobalardy iske asyrýdy josparlap otyr.

Eske sala keteıik, Astana Hub Qazaqstan Respýblıkasynyń Tuńǵysh Prezıdenti Nursultan Nazarbaevtyń bastamasymen, «Tsıfrlyq Qazaqstan» memlekettik baǵdarlamasynyń besinshi baǵyty boıynsha 2018 jyldyń 6 qarashasynda ashylǵan bolatyn. Qazirge deıin tartylǵan ınvestıtsııalardyń jıyntyq mólsheri 17 mıllıard teńgeden asqan.

Avtory: Elaman Turysbekov